Kryesia e Lidhjes Demokratike të Kosovës (LDK) ka miratuar unanimisht marrëveshjen politike për tejkalimin e krizës institucionale dhe për përmbylljen e procesit të zgjedhjes së Presidentit të Republikës së Kosovës.
Në një deklaratë të publikuar të martën, LDK-ja bëri të ditur se Kryesia, në bazë të autorizimeve të Kuvendit të partisë dhe përgjegjësive statutare, ka miratuar marrëveshjen e arritur nga ekipi negociues i LDK-së.
Në kuadër të kësaj marrëveshjeje, partia ka vendosur të mbështesë profesorin Bekim Sejdiu për President të Republikës së Kosovës.
Sipas LDK-së, vendimi është marrë me qëllim të garantimit të stabilitetit institucional, shmangies së një krize të re politike dhe krijimit të kushteve për funksionimin e rregullt të institucioneve të vendit.
“Ky proces nuk lidhet vetëm me zgjedhjen e një individi. Ai lidhet, para së gjithash, me ruajtjen e institucioneve të Republikës, shmangien e një krize të re politike dhe krijimin e kushteve për funksionim të qëndrueshëm institucional”, thuhet në deklaratë.
LDK-ja: Sejdiu i përmbush kriteret për President
Partia e Isa Mustafës vlerëson se zgjedhja e Presidentit kërkon një personalitet me integritet, përgatitje profesionale dhe përvojë institucionale, i cili mund të përfaqësojë unitetin e qytetarëve të Kosovës.
LDK-ja thekson se Bekim Sejdiu i përmbush këto kritere.
Sipas deklaratës, Sejdiu është jurist, profesor universitar, diplomat dhe ish-gjyqtar i Gjykatës Kushtetuese, ndërsa përvoja e tij në fushën kushtetuese dhe në diplomaci, sipas LDK-së, përbën bazë për ushtrimin e pavarur dhe të paanshëm të detyrës së Presidentit.
Kryesia e LDK-së vlerëson se kandidatura e Sejdiut mund t’i shërbejë nevojës së Kosovës për një President që qëndron mbi ndarjet partiake, respekton Kushtetutën dhe përfaqëson vendin brenda dhe jashtë Kosovës.
Thirrje deputetëve të LDK-së
Kryesia u ka bërë thirrje deputetëve të Grupit Parlamentar të LDK-së që gjatë procesit të votimit të veprojnë në përputhje me autorizimet e Kuvendit të partisë dhe vendimin e Kryesisë.
Në deklaratë theksohet se, në çështjet që lidhen me stabilitetin dhe të ardhmen institucionale të Kosovës, përgjegjësia ndaj Republikës duhet të jetë mbi çdo konsideratë tjetër.
LDK-ja ka deklaruar se do të vazhdojë të veprojë me “maturi, unitet dhe përgjegjësi”, duke e vendosur interesin e Republikës së Kosovës në qendër të veprimit të saj politik.
