Presidenti turk Recep Tayyip Erdogan i ka bërë thirrje Greqisë të ndryshojë qëndrim dhe të heqë dorë nga ajo që Ankara e konsideron si militarizim të ishujve të Egjeut me status të çmilitarizuar. Ai paralajmëroi se qasja e qetë e Turqisë nuk duhet të interpretohet si dobësi.
Presidenti turk, Recep Tayyip Erdogan, gjatë kthimit nga Bishkeku i Kirgistanit, ku mori pjesë në samitin e Organizatës së Bashkëpunimit të Shangait, foli për marrëdhëniet mes Turqisë dhe Greqisë, duke i kërkuar Athinës të respektojë traktatet ndërkombëtare.
“Turqia nuk ka ambicie në lidhje me territorin e askujt, por nuk do të lejojë askënd të shkelë të drejtat e saj”, deklaroi Erdogan.
Ai i bëri thirrje Greqisë të braktisë, sipas tij, “rrugën e gabuar” dhe të respektojë marrëveshjet ndërkombëtare.
“Injorimi dhe shkelja e traktateve ndërkombëtare nuk do t’i sjellë dobi askujt. Kushdo që e interpreton qasjen e qetë dhe racionale të Turqisë si dobësi, po bën një gabim të rëndë”, tha presidenti turk.
Erdogan: Ne kemi qenë pala konstruktive
Erdogan tha se Ankara po përpiqet të përmirësojë marrëdhëniet greko-turke mbi bazën e fqinjësisë së mirë dhe se Turqia ka ndjekur një qasje konstruktive.
“Ne kemi qenë pala konstruktive. Megjithatë, shumicën e kohës nuk kemi parë një përgjigje reciproke ndaj qëllimeve tona të mira”, u shpreh ai.
Presidenti turk kërkoi konkretisht që Greqia të “ndryshojë kursin” dhe të ndalojë, siç e përshkroi ai, militarizimin e ishujve të Egjeut që kanë status të çmilitarizuar.
Erdogan nuk specifikoi se cilat hapa konkretë pret nga Athina, por theksoi se historia duhet të shërbejë si udhërrëfyes për ata që janë të gatshëm të mësojnë prej saj.
“Ne do të vazhdojmë të punojmë për paqen, sigurinë dhe stabilitetin në rajonin tonë”, tha ai.
Athina kundërshton interpretimin e Ankarasë
Greqia, nga ana tjetër, e kundërshton interpretimin turk të traktateve ndërkombëtare lidhur me statusin e ishujve të Egjeut.
Athina argumenton se traktatet nuk vendosin një regjim të përgjithshëm çmilitarizimi për ishujt dhe se Greqia ruan të drejtën për të mbrojtur territorin e saj në përputhje me të drejtën ndërkombëtare.
Përplasja për statusin ushtarak të ishujve është një prej çështjeve të ndjeshme në marrëdhëniet mes dy vendeve, të cilat, pavarësisht përpjekjeve për dialog dhe përmirësim të marrëdhënieve, vazhdojnë të kenë mosmarrëveshje të rëndësishme në Egje dhe Mesdheun Lindor.
Erdogan përmend edhe Organizatën e Bashkëpunimit të Shangait
Në deklaratat e tij, Erdogan foli edhe për orientimin e politikës së jashtme turke, duke thënë se Ankara do të shqyrtojë forcimin e marrëdhënieve me Organizatën e Bashkëpunimit të Shangait, ku bëjnë pjesë Kina dhe Rusia.
Megjithatë, ai theksoi se afrimi me këtë organizatë nuk duhet të interpretohet si shkëputje nga Perëndimi.
“Perspektiva e Turqisë për anëtarësim të plotë në organizatë nuk nënkupton një shkëputje nga ndonjë bllok tjetër apo nga Perëndimi”, tha Erdogan.
Turqia është anëtare e NATO-s, ndërsa marrëdhëniet e saj me Rusinë dhe Kinën janë zgjeruar në fusha të ndryshme, duke e bërë politikën e jashtme të Ankarasë një faktor të rëndësishëm në ekuilibrat mes Perëndimit dhe fuqive të tjera.
