Këngëtari Besart Kelmendi, i njohur si Gjesti, është dënuar nga Gjykata Themelore në Prishtinë me dy vite burgim me kusht dhe 6 mijë euro gjobë, pas pranimit të fajësisë për tri vepra penale.
Gjykata Themelore në Prishtinë ka aprovuar marrëveshjen për pranimin e fajësisë dhe ka shpallur aktgjykimin ndaj këngëtarit Besart Kelmendi, i njohur publikisht si Gjesti.
Aktgjykimi është shpallur të hënën nga gjykatësja Edita Çanta, ndërsa Gjesti është dënuar për veprat penale “Armëmbajtje pa leje”, “Kanosje” dhe “Asgjësim apo dëmtim i pasurisë”.
Dy vite burgim me kusht për kanosjen
Për veprën penale të kanosjes, gjykata ka caktuar dënimin prej dy vitesh burgim me kusht.
Ky dënim nuk do të ekzekutohet nëse Gjesti nuk kryen një vepër tjetër penale brenda periudhës prej dy vitesh, pasi aktgjykimi të bëhet i plotfuqishëm.
Ndërkaq, për veprën penale “Asgjësim apo dëmtim i pasurisë”, gjykata ka shqiptuar gjobë prej 3 mijë eurosh.
Për veprën “Armëmbajtje pa leje”, Gjesti është dënuar me një tjetër gjobë prej 3 mijë eurosh.
Dënimi unik: 2 vite burgim me kusht dhe 6 mijë euro gjobë
Pas bashkimit të dënimeve për veprat penale, gjykata ka caktuar një dënim unik prej dy vitesh burgim me kusht dhe 6 mijë euro gjobë.
Vendimi është marrë pas aprovimit nga gjykata të marrëveshjes për pranimin e fajësisë.
Si ndodhi rasti?
Sipas aktakuzës dhe raportimeve lidhur me rastin, Gjesti kishte hyrë i armatosur në ambientet e kompanisë që dispononte të drejtat e tij muzikore.
Ngjarja kishte ardhur pas një konflikti lidhur me pagesat dhe raportet me drejtuesin e kompanisë.
Me pranimin e fajësisë dhe aprovimin e marrëveshjes nga Gjykata Themelore në Prishtinë, procesi gjyqësor ndaj këngëtarit ka përfunduar me shqiptimin e dënimit unik.
Dënimi me kusht nënkupton se pjesa e burgimit nuk ekzekutohet, përveçse nëse plotësohen kushtet e përcaktuara nga gjykata gjatë periudhës së provës.
