Kryetari i Prishtinës, Përparim Rama, ka bërë të ditur se Kuvendi i Kryeqytetit ka votuar krijimin e Ndërmarrjes Komunale “Pastrimi”, e cila, sipas tij, do të menaxhojë shërbimet e pastrimit në kryeqytet.
Rama ka thënë se me këtë vendim Prishtina po kalon nga një kompani rajonale, e cila menaxhonte shërbimin për gjashtë komuna, në një ndërmarrje në pronësi të Kryeqytetit.
“Një sistem i ri” për menaxhimin e mbeturinave
Sipas Ramës, themelimi i ndërmarrjes së re përbën fillimin e një sistemi të ri, ku Prishtina do të planifikojë dhe investojë vetë, do të rrisë kapacitetet dhe do të mbajë përgjegjësi të drejtpërdrejtë për pastërtinë e qytetit.
“Sot u votua për një zgjidhje afatgjatë për menaxhimin e mbeturinave në Kryeqytet dhe falënderoj të gjithë asambleistët që votuan për!”, ka shkruar Rama.
Ai e ka përmbyllur postimin me urimin për Prishtinën, duke e cilësuar vendimin si fillimin e një kapitulli të ri për kryeqytetin.
