Ministri i Jashtëm i Gjermanisë, Johann Wadephul, zhvilloi të shtunën një takim me homologun e tij rus, Sergey Lavrov, në Nju Jork, në kuadër të punimeve të Asamblesë së Përgjithshme të Kombeve të Bashkuara.
Takimi, që zgjati rreth 30 minuta, ishte i pari mes ministrave të jashtëm gjerman dhe rus që nga fillimi i pushtimit të plotë rus të Ukrainës në vitin 2022.
Sipas një zyrtari gjerman, Wadephul i kërkoi Moskës të heqë dorë nga ajo që Berlini e konsideron rrugë të rrezikshme të përshkallëzimit ndaj Gjermanisë, Evropës dhe NATO-s. Zyrtari tha gjithashtu se ministri gjerman dënoi sulmet ruse ndaj popullsisë civile në Ukrainë.
Takimi u zhvillua në një periudhë tensionesh të shtuara mes Berlinit dhe Moskës. Qeveria gjermane ka akuzuar zyrtarisht Rusinë për përgjegjësi për sulmin hibrid të 4 gushtit në aeroportin Leipzig/Halle, ndërsa ka ndërmarrë masa diplomatike dhe të sigurisë ndaj Moskës.
Sipas Berlinit, hetimet policore, modelet e sulmit dhe të dhënat e shërbimeve të inteligjencës kanë çuar në përfundimin për përgjegjësi ruse, ndërsa procedurat penale për rastin ende vazhdojnë.
Gjatë takimit, Wadephul ka theksuar se incidente të tilla dhe sulmet hibride nuk do ta ndryshojnë qëndrimin e Gjermanisë për të mbështetur Ukrainën, por sipas tij ato dëmtojnë më tej marrëdhëniet tashmë të tensionuara mes Berlinit dhe Moskës.
Nga pala ruse nuk është publikuar menjëherë një përmbledhje e plotë e diskutimeve. Zëdhënësja e Ministrisë së Jashtme ruse, Maria Zakharova, dha një version tjetër lidhur me iniciativën për takimin, duke pretenduar se Wadephul kishte kërkuar të takohej me Lavrovin. Wadephul, ndërkaq, tha për televizionin gjerman ZDF se kishte pranuar takimin pasi përmes palëve të treta ishte përcjellë një gatishmëri ruse për bisedime.
Takimi në Nju Jork u zhvillua ndërkohë që po shtohen përpjekjet diplomatike për rikthimin e negociatave lidhur me luftën në Ukrainë.
Një ditë më herët, Wadephul kishte mirëpritur ftesën amerikane për presidentin rus Vladimir Putin për të marrë pjesë në samitin e G20 në Miami në muajin dhjetor. Ministri gjerman e cilësoi këtë një mundësi që duhet shfrytëzuar dhe një “provë lakmusi” për gatishmërinë e Putinit për negociata.
“Okazionet e tilla duhet të shfrytëzohen”, kishte deklaruar Wadephul, duke shtuar se, sipas tij, një armëpushim do të ishte i nevojshëm për zhvillimin e negociatave serioze.
Në këtë mënyrë, takimi Wadephul-Lavrov vjen në një moment kur Gjermania vazhdon të mbajë një qëndrim të ashpër ndaj veprimeve të Moskës, ndërsa njëkohësisht mbështet përdorimin e kanaleve diplomatike për të kërkuar një rrugë drejt negociatave për Ukrainën.