Izraeli ka urdhëruar mbylljen e Konsullatës së Përgjithshme britanike në Jerusalemin Lindor, në një zhvillim që shënon përshkallëzim të ri të marrëdhënieve mes dy vendeve.
Vendimi ka hyrë në fuqi të enjten, më 8 tetor, pas përfundimit të afatit 30-ditor të përcaktuar nga autoritetet izraelite.
Punonjësit janë parë duke hequr tabelat dhe simbolet identifikuese nga ndërtesa e konsullatës në lagjen Sheikh Jarrah. Sipas Reuters, nga godina janë larguar edhe tabelat me mbishkrimin “Konsullata e Përgjithshme Britanike” dhe ato që identifikonin sektorin konsullor.
Rreth 30 diplomatë britanikë dhe familjarë të tyre preken nga mbyllja, ndërsa Ambasada britanike në Tel Aviv vazhdon të funksionojë.
Konsullata në Jerusalem ka pasur për dekada rol të rëndësishëm në marrëdhëniet e Britanisë së Madhe me palestinezët në Jerusalemin Lindor, Bregun Perëndimor dhe Gazën, si dhe në ofrimin e shërbimeve konsullore.
Vendimi pas masave britanike ndaj vendbanimeve
Mbyllja vjen pas masave të ndërmarra nga Britania e Madhe ndaj vendbanimeve izraelite në Bregun Perëndimor.
Londra ka njoftuar kufizime ndaj importeve të mallrave të prodhuara në këto vendbanime, si dhe sanksione ndaj individëve dhe kompanive që, sipas qeverisë britanike, mbështesin, lehtësojnë ose përfitojnë nga aktivitetet e vendbanimeve.
Qeveria britanike ka deklaruar se masat synojnë të mbrojnë mundësinë e realizimit të zgjidhjes me dy shtete për konfliktin izraelito-palestinez.
