Presidenti rus, Vladimir Putin, është pajtuar për rifillimin e negociatave trepalëshe mes Rusisë, Ukrainës dhe Shteteve të Bashkuara të Amerikës, me synimin për t’i dhënë fund luftës në Ukrainë. Takimet pritet të zhvillohen në mesin e muajit nëntor, ndërsa ende nuk ka një datë të konfirmuar.
Lajmin e bëri të ditur Yuri Ushakov, këshilltar i Putinit për politikën e jashtme, pas takimit të zhvilluar të mërkurën në Shën Petersburg mes liderit rus dhe Steve Witkoff, të dërguarit të presidentit amerikan, Donald Trump.
Sipas Ushakovit, palët po shqyrtojnë mundësinë që bisedimet të zhvillohen në Abu Dhabi, pas datës 10 nëntor.
“Ne po synojmë Abu Dhabin. Pati një marrëveshje që ndoshta t’i mbajmë ato në mesin e nëntorit, pas 10 nëntorit”, deklaroi Ushakov.
Kremlini: Nuk e dimë sa afër jemi fundit të luftës
I pyetur për mundësinë e përfundimit të luftës, këshilltari i Putinit nuk dha një afat konkret, por tha se përpjekjet diplomatike po vazhdojnë në këtë drejtim.
“Nuk e di sa afër jemi, por po ecim në atë drejtim”, u shpreh Ushakov.
Takimi mes Putinit dhe Witkoffit u zhvillua në një kohë kur presidenti amerikan, Donald Trump, po ushtron presion ndaj Kievit për arritjen e një marrëveshjeje që do t’u jepte fund luftimeve.
Ndërkohë, presidenti ukrainas, Volodymyr Zelenskyy, ka këmbëngulur se zgjidhja e ngërçit kërkon një samit mes liderëve të vendeve të përfshira në konflikt.
Pavarësisht përpjekjeve diplomatike, luftimet në terren vazhdojnë, ndërsa Rusia dhe Ukraina vijojnë sulmet e përditshme, përfshirë ato me armë me rreze të gjatë veprimi.
Përfaqësuesit e Rusisë, Ukrainës dhe SHBA-së zhvilluan tri raunde negociatash në fillim të këtij viti, me takime në Abu Dhabi në janar dhe shkurt, si dhe në Gjenevë në shkurt.
Witkoff e quajti Putinin “të dhembshur”, kritika në SHBA
Ndërkohë, i dërguari amerikan Steve Witkoff është përballur me kritika në SHBA pasi e cilësoi Putinin si “të dhembshur”, duke e falënderuar për lirimin e Stephen Hubbard, një shtetasi amerikan që ishte mbajtur në burg në Rusi për katër vjet.
“Ju flisni shumë për presidentin tim, Presidentin Trump, se është i dhembshur. Edhe ju jeni i dhembshur, ju pranoj këtë, ju përgëzoj për këtë dhe ju falënderoj përsëri”, i tha Witkoff presidentit rus.
Deklarata nxiti reagime nga disa politikanë amerikanë, të cilët e kritikuan mënyrën se si i dërguari i Trumpit iu referua liderit rus.
Senatori republikan Thom Tillis kundërshtoi vlerësimin e Witkoffit, duke iu referuar viktimave të luftës në Ukrainë dhe fëmijëve që, sipas tij, janë rrëmbyer dhe vrarë.
“Duhet të kërkoni kuptimin e fjalës ‘i dhembshur’ në fjalor. Duhet të ktheheni në Ukrainë dhe t’i pyesni familjet e fëmijëve të rrëmbyer dhe të vrarë nga Putini nëse mendojnë se ai është i dhembshur”, deklaroi Tillis.
Edhe kongresmeni republikan Don Bacon i cilësoi fjalët e Witkoffit si “një tjetër turp”, ndërsa kritikat pasqyrojnë ndasitë në SHBA lidhur me qasjen ndaj Moskës dhe përpjekjet për t’i dhënë fund luftës në Ukrainë.
