Presidenti ukrainas thotë se Kievi është i gatshëm për armëpushim, por kërkon garanci të forta sigurie dhe mbështetje afatgjatë për ushtrinë. Ai shpreson që negociatat në nivel teknik të hapin rrugën për një takim mes liderëve të tre vendeve.
Presidenti i Ukrainës, Volodymyr Zelensky, ka njoftuar se negociatorët e Ukrainës, Rusisë dhe Shteteve të Bashkuara pritet të takohen në gjysmën e parë të nëntorit në Abu Dhabi, në përpjekje për të avancuar bisedimet për përfundimin e luftës.
Gjatë një lidhjeje me video me institutin amerikan Hudson Institute, Zelensky tha se synimi është që takimi të mbahet sa më shpejt dhe të krijojë mundësi për një takim të nivelit më të lartë mes udhëheqësve të tri vendeve, raporton Reuters.
Ai bëri të ditur se kishte biseduar me të dërguarit amerikanë Jared Kushner dhe Steve Witkoff, pas takimit të tyre me presidentin rus, Vladimir Putin, në fillim të javës.
Zelensky: Jemi gati për armëpushim
Kreu i shtetit ukrainas deklaroi se Kievi është i gatshëm të negociojë për një armëpushim të plotë, por edhe për marrëveshje më të kufizuara, që mund të përfshijnë sektorin energjetik dhe operacionet detare.
Megjithatë, ai theksoi se çdo marrëveshje paqeje duhet të shoqërohet me garanci të forta sigurie për Ukrainën. Sipas tij, nevojitet gjithashtu financim për një periudhë dhjetëvjeçare, në mënyrë që vendi të ruajë kapacitetet e ushtrisë.
Zelensky kërkoi edhe përfshirjen e Evropës në procesin negociator, ndërsa çështjen e territoreve e cilësoi si një temë të ndjeshme që duhet të trajtohet në nivelin e liderëve.
Shqetësimet për mbrojtjen dhe sanksionet
Gjatë deklaratave të tij, presidenti ukrainas ngriti shqetësime për kufizimet në sistemet satelitore Starlink, të cilat, sipas tij, po vështirësojnë operacionet ushtarake të Ukrainës.
Ai tha se Kievi është ende në pritje të raketave përgjuese për mbrojtjen ajrore, në një kohë kur sulmet ruse me dronë dhe raketa vazhdojnë.
Zelensky kritikoi gjithashtu lehtësimin e disa sanksioneve perëndimore ndaj Moskës, duke argumentuar se presioni ekonomik duhet të vazhdojë për të frenuar agresionin rus.
Ndërkohë, sipas raportimit të Reuters, Shtëpia e Bardhë nuk kishte dhënë ende një koment zyrtar për takimin e planifikuar në Abu Dhabi.
