Presidenti i Ukrainës, Volodymyr Zelenskyy, ka konfirmuar se bisedimet trepalëshe mes Ukrainës, Rusisë dhe Shteteve të Bashkuara pritet të zhvillohen në nëntor, në përpjekje për të rifilluar negociatat e bllokuara për përfundimin e luftës.
“Ne jemi të gatshëm të flasim. Nëse bëhet fjalë për çështje territoriale, ato duhet të trajtohen në nivel të udhëheqësve. Çështjet e tjera janë në kompetencën e grupeve teknike. E gjithë kjo mund të diskutohet në nëntor”, ka deklaruar Zelenskyy në një intervistë për televizionin ukrainas.
Njoftimi vjen në kohën kur administrata e presidentit amerikan, Donald Trump, ka intensifikuar përpjekjet diplomatike për rikthimin e palëve në tryezën e negociatave.
Takimet diplomatike në Oslo dhe Shën Petersburg
I dërguari amerikan Steve Witkoff është takuar të martën në Oslo me Zelenskyyn dhe udhëheqës evropianë, ndërsa të mërkurën ka zhvilluar takim me presidentin rus, Vladimir Putin, në Shën Petersburg.
Pas këtyre takimeve, si Kievi, ashtu edhe Moska kanë shprehur gatishmërinë për rifillimin e bisedimeve të drejtpërdrejta, me ndërmjetësimin e Uashingtonit.
Këshilltari i Putinit për çështjet e jashtme, Yuri Ushakov, ka deklaruar se presidenti rus ka rënë dakord “në parim” për rifillimin e negociatave pas 10 nëntorit.
Sipas Ushakovit, bisedimet do të përqendrohen edhe në krijimin e një sistemi sigurie për Rusinë dhe Ukrainën pas përfundimit të luftës.
Zelenskyy ka mbështetur përpjekjet amerikane për përshpejtimin e procesit diplomatik.
“Axhenda është e qartë: t’i jepet fund luftës, të afrohet paqja dhe të përgatitet gjithçka për një takim në nivel të udhëheqësve”, ka deklaruar ai në një mesazh audio të publikuar të mërkurën në mbrëmje.
Negociatat e mëparshme nuk sollën përparim të madh
Përfaqësuesit e Ukrainës, Rusisë dhe SHBA-së kanë zhvilluar tri raunde negociatash në fillim të këtij viti: dy në Abu Dhabi, në janar dhe shkurt, dhe një tjetër në Gjenevë, në shkurt.
Megjithatë, bisedimet nuk kanë sjellë përparim të dukshëm drejt një marrëveshjeje për paqe, përtej shkëmbimeve të të burgosurve të luftës.
Moska dhe Kievi kanë vazhduar të mbajnë qëndrimet e tyre lidhur me kërkesat kryesore për përfundimin e konfliktit, i cili ka hyrë në vitin e pestë që nga nisja e pushtimit të plotë rus të Ukrainës në shkurt të vitit 2022.
Zhvillimi i një raundi të ri bisedimesh në nëntor mund të krijojë një mundësi tjetër për rifillimin e negociatave, por ende nuk është bërë e ditur një datë e saktë dhe nuk ka garanci se ato do të çojnë në një marrëveshje.
