Kancelari gjerman, Friedrich Merz, ka thënë se është befasuar nga reagimi i fortë i vendeve të Azisë Lindore ndaj planit franko-gjerman “Made in Europe”, i cili synon të kufizojë subvencionet për automjetet që nuk prodhohen në Evropë.
Propozimi, për të cilin janë dakorduar Merz dhe presidenti francez Emmanuel Macron, parasheh që subvencionet për automjetet të kufizohen për ato të prodhuara brenda Bashkimit Evropian, Zvicrës dhe Mbretërisë së Bashkuar.
Ky plan ka shkaktuar shqetësim në Japoni, Korenë e Jugut dhe Singapor, të cilat druajnë se masat mund të krijojnë barriera të reja tregtare dhe të kufizojnë konkurrencën e prodhuesve aziatikë në tregun evropian.
Japonia dhe Koreja e Jugut kundërshtojnë kufizimet
Presidenti i Koresë së Jugut, Lee Jae Myung, bëri të ditur se i kishte kërkuar Merzit që Koreja e Jugut të trajtohej në mënyrë të barabartë me vendet anëtare të BE-së.
Shqetësime të ngjashme janë shprehur edhe nga Japonia.
Duke komentuar reagimet gjatë kthimit nga vizita pesëditore në Azinë Lindore, Merz tha se ishte befasuar nga intensiteti i kundërshtimeve.
Ai pranoi se propozimi franko-gjerman kishte shkaktuar “shqetësim të konsiderueshëm” në rajon, pasi vendet aziatike kanë frikë se Evropa mund të jetë duke u orientuar drejt një politike të re proteksioniste.
Kancelari gjerman u zotua se këto shqetësime do t’i marrë seriozisht dhe do t’i ngrejë në samitin e ardhshëm të liderëve të Bashkimit Evropian, që pritet të mbahet në Dublin më 13 nëntor.
Merz propozon aleancë globale për tregtinë
Gjatë vizitave në Seul dhe Tokio, Merz ka propozuar krijimin e një aleance politike globale për mbrojtjen e tregtisë së bazuar në rregulla ndërkombëtare.
Në këtë bashkëpunim, sipas tij, duhet të përfshihen BE-ja, vendet aziatike, Kanadaja, Australia, Zelanda e Re dhe blloku tregtar Mercosur i Amerikës së Jugut.
Propozimi synon koordinimin e këtyre vendeve përballë presioneve ekonomike dhe shkeljeve të rregullave ndërkombëtare të tregtisë, përfshirë kufizimet e mundshme kineze në eksportin e metaleve të rralla dhe kërcënimet tarifore të presidentit amerikan Donald Trump.
Megjithatë, kundërshtimi i Japonisë dhe Koresë së Jugut ndaj planit “Made in Europe” tregon se dallimet konkrete në politikat industriale mund ta vështirësojnë krijimin e aleancës më të gjerë tregtare që po propozon kancelari gjerman.
