Presidenti i Izraelit, Isaac Herzog, ka shprehur shqetësimin e tij pas deklaratës së presidentit amerikan Donald Trump për përfundimin e ndihmës ushtarake të SHBA-së për Izraelin, në vlerë prej 3.8 miliardë dollarësh në vit.
Herzog e ka cilësuar njoftimin si një “rrufe në qiell të hapur”, duke rikujtuar se marrëveshja aktuale mes dy vendeve parashihte vazhdimin e ndihmës deri në vitin 2028.
Ai e ngriti këtë çështje gjatë një takimi me përfaqësues të partisë Yashar, të udhëhequr nga Gadi Eisenkot, një prej kundërshtarëve kryesorë politikë të kryeministrit Benjamin Netanyahu.
“Çështja e ndihmës amerikane më shqetëson shumë dhe erdhi si një rrufe në qiell të hapur. Ne kemi një memorandum mirëkuptimi me SHBA-në, i cili supozohet të zgjasë deri në vitin 2028”, deklaroi Herzog, sipas CNN.
Ai shtoi se kjo çështje përbën një nga objektivat kryesore të vendit, duke theksuar nevojën për formimin e një qeverie dhe shmangien e zgjedhjeve të përsëritura.
Trump paralajmëroi përfundimin e ndihmës dy vjet para afatit
Donald Trump njoftoi gjatë ditës së zgjedhjeve të mesmandatit në SHBA se ndihma ushtarake për Izraelin, në vlerë prej 3.8 miliardë dollarësh në vit, do të përfundojë këtë vit.
Ky vendim, nëse zbatohet sipas deklaratës së tij, do të nënkuptonte ndërprerjen e ndihmës dy vjet para përfundimit të memorandumit të mirëkuptimit mes dy vendeve, i cili është i vlefshëm deri në vitin 2028.
Deklarata u bë gjatë një interviste telefonike për televizionin Fox News. Ndërkohë, kryeministri izraelit Benjamin Netanyahu nuk kishte reaguar ende publikisht lidhur me këtë çështje në kohën e raportimit.
Ambasadori amerikan kërkon sqarime për deklaratën e Trumpit
Ambasadori amerikan në Izrael, Mike Huckabee, ka kërkuar sqarime për deklaratën e presidentit Trump gjatë një interviste për televizionin izraelit Channel 12 News.
Megjithatë, ai ka mbrojtur vazhdimin e ndihmës ushtarake amerikane për Izraelin, në një kohë kur kjo mbështetje po përballet me kritika dhe kundërshtime gjithnjë e më të mëdha brenda të dyja partive kryesore amerikane.
“Amerikanët duhet ta kuptojnë vlerën e kësaj marrëdhënieje. Nuk ka rëndësi se sa investojnë amerikanët në të, por çfarë përfitojnë prej saj”, ka deklaruar Huckabee.
Ai ka shtuar se, sipas tij, nuk është bërë mjaftueshëm për t’i shpjeguar publikut amerikan përfitimet që ka sjellë bashkëpunimi me Izraelin.
Huckabee kundërshton deklaratat e JD Vance
Ambasadori amerikan ka kundërshtuar gjithashtu qëndrimin e zëvendëspresidentit JD Vance, i cili kishte lidhur marrëdhëniet me Izraelin me humbjet e republikanëve në zgjedhjet e mesmandatit.
Huckabee, i njohur për mbështetjen e tij të fortë ndaj Izraelit, ka deklaruar se nuk beson që mbështetja për këtë vend është bërë “toksike” në mesin e konservatorëve dhe brenda Partisë Republikane.
Deklaratat e fundit kanë nxjerrë në pah debatet në Uashington rreth së ardhmes së ndihmës ushtarake për Izraelin dhe ndikimit të kësaj çështjeje në marrëdhëniet mes dy aleatëve.
