Presidenti amerikan Donald Trump është shprehur optimist se marrëveshja për përfundimin e luftës në Ukrainë është afër. Sipas tij, një nga pengesat kryesore për arritjen e paqes është armiqësia personale mes presidentit ukrainas Volodymyr Zelensky dhe presidentit rus Vladimir Putin.
Në një intervistë për televizionin amerikan CBS News, Trump përsëriti pretendimin se lufta nuk do të kishte nisur nëse ai do të kishte qenë president në atë kohë. Ai tha se konflikti mund të përfundojë së shpejti falë përpjekjeve të administratës së tij.
I pyetur se cilit prej dy liderëve i beson më shumë, Trump shmangu një përgjigje të drejtpërdrejtë, duke thënë se ka marrëdhënie të mira me të dy.
Ai pranoi se pakënaqësia e Zelenskyt ndaj Putinit është e kuptueshme, pasi Rusia pushtoi Ukrainën. Megjithatë, pretendoi se gjatë takimit të parë mes dy liderëve, Putini ishte përballur me mungesë respekti.
Trump: Jemi shumë pranë marrëveshjes
Duke folur për negociatat mes Rusisë dhe Ukrainës, presidenti amerikan deklaroi se pret që lufta të përfundojë së shpejti. Megjithatë, ai paralajmëroi se Ukraina mund të ketë një konfigurim territorial ndryshe nga ai aktual.
“Besoj se do të arrijmë ta përfundojmë. Besoj se kjo do të ndodhë, por Ukraina do të përfundojë me një konfigurim disi të ndryshëm”, deklaroi Trump.
Ai iu referua edhe negociatave trepalëshe mes Shteteve të Bashkuara, Ukrainës dhe Rusisë, të planifikuara të zhvillohen në Abu Dhabi më 10 dhe 11 nëntor. Trump shprehu bindjen se palët janë shumë pranë arritjes së një marrëveshjeje.
“Besoj se kjo luftë do të përfundojë dhe do të përfundojë së shpejti. Dhe arsyeja e vetme pse do të përfundojë është merita ime”, përfundoi presidenti amerikan.
