Kryesia e Kuvendit të Republikës së Kosovës do të mblidhet sot, të hënën, për të shqyrtuar dhe propozuar rendin e ditës për seancën e ardhshme plenare.
Ndër pikat kryesore të parapara për shqyrtim është interpelanca me ministrin e Shëndetësisë, Arben Vitia, lidhur me vdekjen e një pacienteje me kancer të gjirit, e cila, sipas çështjes së ngritur, kishte mbetur katër muaj pa terapi, si dhe mungesën e barnave onkologjike.
Në rendin e ditës është përfshirë edhe mocioni përmbajtjesor lidhur me gjendjen në planifikimin, çmimin dhe furnizimin me energji elektrike në Kosovë.
Po ashtu, deputetët do të kenë mundësi të bëjnë deklarime jashtë rendit të ditës dhe të parashtrojnë pyetje parlamentare.
Seanca plenare pritet të nisë me miratimin e procesverbalit nga seanca e kaluar, ndërsa më pas deputetët do të shqyrtojnë pikat e parapara në rendin e ditës.
