Rreth 130 mijë punonjës në sektorin e infermierisë, kujdesit dhe shërbimeve sociale në Austri do të përfitojnë rritje pagash nga 1 janari 2027. Rritja do të jetë së paku 2.3 për qind dhe mund të arrijë deri në 2.5 për qind, varësisht nga inflacioni.
Lajmi prek edhe shumë shqiptarë që jetojnë dhe punojnë në Austri, veçanërisht ata të angazhuar në spitale, institucione të kujdesit për të moshuarit, shërbime sociale dhe organizata që ofrojnë përkujdesje.
Sipas marrëveshjes së arritur ndërmjet sindikatave dhe punëdhënësve në janar të vitit 2026, kjo është faza e dytë e rritjes së dakorduar për dy vjet. Në prill të vitit 2026, pagat e përcaktuara me marrëveshje kolektive u rritën me 2.6 për qind, ndërsa pagat reale me 2.4 për qind.
Sa do të rriten pagat nga janari 2027?
Rritja bazë prej 2.3 për qind është e garantuar. Nëse inflacioni mesatar gjatë periudhës nëntor 2025 – tetor 2026 rezulton më i lartë, një pjesë e diferencës do të përfshihet në rritje, deri në kufirin maksimal prej 2.5 për qind.
Partnerët socialë pritet ta bëjnë të ditur përqindjen përfundimtare në dhjetor 2026.
Për punonjësit që paguhen mbi nivelin e përcaktuar me marrëveshjen kolektive, parashihet rritje prej 2.3 për qind e pagës aktuale.
Shembuj konkretë të pagave të reja
Sipas tabelës së publikuar nga Finanz.at, për një orar të plotë prej 37 orësh në javë, pagat fillestare në disa kategori do të ndryshojnë si më poshtë:
| Kategoria | Paga aktuale | Me rritje 2.3% | Me rritje 2.5% |
|---|---|---|---|
| Grupi 4 | 2,494.30 € | 2,551.70 € | 2,556.70 € |
| Grupi 6 | 2,867.20 € | 2,933.10 € | 2,938.90 € |
| Grupi 7 | 3,074.80 € | 3,145.50 € | 3,151.70 € |
| Grupi 8 | 3,348.90 € | 3,425.90 € | 3,432.60 € |
Për shembull, një punonjës në grupin e pagave 7, me pagë aktuale bruto prej 3,074.80 eurosh, do të përfitojë rritje prej rreth 71 deri në 77 euro bruto në muaj.
Sipas përllogaritjeve të Finanz.at, kjo mund të përkthehet në rreth 41 deri në 44 euro më shumë neto në muaj, ose afërsisht 597 deri në 649 euro neto në vit, duke përfshirë edhe pagesat e veçanta për pushime dhe Krishtlindje.
Shuma përfundimtare neto varet nga paga, kategoria dhe rrethanat individuale tatimore të punonjësit.
Ndryshime edhe në orarin e punës dhe shtesat
Marrëveshja parasheh edhe disa ndryshime të tjera që hyjnë në fuqi nga viti 2027.
Ndërrimet e ndara të punës, jashtë shërbimeve mobile, do të lejohen vetëm në bazë të një marrëveshjeje në nivel të kompanisë ose me pëlqimin e punonjësit.
Gjithashtu, për punonjësit me orar të pjesshëm, kufiri i orëve shtesë të lejuara do të ulet nga tetë në katër orë.
Ndërkohë, ndihma për kujdesin, në vlerë prej 135.50 euro bruto në muaj për punonjësit me orar të plotë, është zgjatur deri në fund të vitit 2027.
Rritje edhe për punonjësit e Caritas-it
Një marrëveshje e ngjashme është arritur edhe për punonjësit e Caritas-it, e cila përfshin më shumë se 17 mijë persona.
Edhe në këtë institucion, pas rritjes së pagave në prill 2026, nga janari 2027 do të zbatohet një rritje prej së paku 2.3 për qind, me mundësi që ajo të arrijë deri në 2.5 për qind.
Marrëveshja parasheh gjithashtu një shkallë të re page për punonjësit që kanë mbi 18 vjet përvojë pune, e cila do të zbatohet nga viti 2027.
Rritje pagash janë realizuar ose janë negociuar edhe në sektorë të tjerë të ekonomisë austriake, duke prekur qindra mijëra punonjës.
