Samiti i liderëve të NATO-s, i planifikuar të mbahej në Shqipëri gjatë vitit 2027, nuk do të zhvillohet sipas kalendarit fillestar, ndërsa Aleanca Veriatlantike ka vendosur të reduktojë edhe numrin e takimeve të nivelit të lartë.
Kryeministri i Shqipërisë, Edi Rama, ka bërë të ditur se Tirana mund të jetë nikoqire e samitit të ardhshëm në vitin 2028, pas ndryshimeve në planifikimin e takimeve të Aleancës.
Ndërkohë, sekretari i përgjithshëm i NATO-s, Mark Rutte, ka deklaruar se samitet e liderëve të vendeve anëtare do të organizohen vetëm kur të konsiderohen të nevojshme.
Ndryshimet në kalendarin e Aleancës nuk kufizohen vetëm te samitet e krerëve të shteteve dhe qeverive.
Sipas njoftimit, ministrat e Mbrojtjes të vendeve anëtare nuk do ta zhvillojnë takimin e planifikuar për tetor të vitit 2027.
Po ashtu, ministrat e Jashtëm të NATO-s pritet të takohen vetëm një herë gjatë vitit të ardhshëm, në vend të dy takimeve që zakonisht organizoheshin brenda një viti.
Reduktimi i takimeve të nivelit të lartë vjen në një periudhë kur Aleanca përballet me diskutime lidhur me shpenzimet për mbrojtjen, sigurinë europiane dhe zhvillimet ndërkombëtare, përfshirë luftën në Ukrainë dhe tensionet që lidhen me Iranin.
Shqipëria ishte paraparë të mirëpriste liderët e vendeve anëtare të NATO-s në vitin 2027, ndërsa pas ndryshimeve të paralajmëruara, mundësia e organizimit të samitit në Tiranë është zhvendosur për vitin 2028.
Megjithatë, mbajtja e samitit në Shqipëri gjatë vitit 2028 mbetet një mundësi e paralajmëruar dhe jo një datë e konfirmuar përfundimisht.

