Ministria e Arsimit dhe Shkencës ka hapur thirrjen për Programin e Kuponëve për kopshte, përmes të cilit familjet përfituese të Skemës së Asistencës Sociale mund të sigurojnë edukim falas për fëmijët e moshës 3 deri në 6 vjeç në kopshte private dhe publiko-private të licencuara.
Programi u mundëson familjeve përfituese të asistencës sociale që t’i regjistrojnë fëmijët në kopshtin e zgjedhur prej tyre, me pagesë të mbuluar plotësisht nga programi, pa kosto për prindërit.
Thirrja vlen për familjet që banojnë në këto komuna: Vushtrri, Gjilan, Prishtinë, Pejë, Drenas, Lipjan, Ferizaj, Shtime, Viti, Fushë Kosovë, Suharekë, Gjakovë, Graçanicë, Mitrovicë, Klinë, Prizren, Obiliq dhe Podujevë.
Kush ka të drejtë të aplikojë?
Për të përfituar nga programi, familja duhet të jetë përfituese e Skemës së Asistencës Sociale, ndërsa fëmija duhet të plotësojë kriterin e moshës dhe të ketë vendbanimin në komunën ku aplikon për vijimin e kopshtit.
Aplikimi mund të bëhet edhe para se fëmija t’i mbushë 3 vjet, përkatësisht nga mosha 2 vjeç e 6 muaj, deri në moshën 5 vjeç e 6 muaj. Megjithatë, fëmija duhet ta nisë vijimin në kopsht në moshën 3-vjeçare dhe ta përfundojë atë kur të fillojë edukimin e detyrueshëm parafillor ose fillor në një institucion publik arsimor.
Mbështetje edhe për transportin
Përveç mbulimit të plotë të pagesës së kopshtit, programi parasheh edhe mbështetje për transportin e fëmijëve që banojnë larg institucionit të përzgjedhur, në rastet kur plotësohen kriteret e përcaktuara në thirrje.
Ministria thekson se pjesëmarrja në këtë program nuk ndikon në përfitimet që familjet i marrin nga Skema e Asistencës Sociale.
Familjet që kanë përfituar më parë duhet të riaplikojnë
Familjet që tashmë janë pjesë e programit, si dhe ato që kanë përfituar gjatë vitit shkollor 2025/2026, duhet t’i konfirmojnë dhe përditësojnë të dhënat dhe dokumentacionin në platformën e-Kosova, nëse fëmijët e tyre tani i përkasin grupmoshës 5–6 vjeç dhe ende nuk e kanë filluar edukimin e detyrueshëm parafillor në një institucion publik.
Sipas MASh-së, këto familje nuk do t’i nënshtrohen sërish përzgjedhjes së rastësishme. Mbështetja do të vazhdojë automatikisht, për aq kohë sa plotësohen kushtet e programit.
Afati dhe mënyra e aplikimit
Aplikimi është i hapur nga 19 nëntori deri më 10 dhjetor 2026 dhe duhet të bëhet nga prindi ose kujdestari ligjor përmes platformës e-Kosova.
Aplikimi online: https://rks-gov.net/596
Për ndihmë gjatë procesit të aplikimit, prindërit mund t’i drejtohen Qendrës për Punë Sociale në komunën e tyre.
Thirrja e plotë dhe kriteret e aplikimit janë publikuar në faqen zyrtare të Ministrisë së Arsimit dhe Shkencës: https://mash.rks-gov.net/
Për informata shtesë:
- Telefoni: 038 200 65048

