Kryetari i Lidhjes Demokratike të Kosovës (LDK), Lumir Abdixhiku, ka bërë të ditur se ka zhvilluar një takim me grupin parlamentar të partisë, në prag të zhvillimeve të reja politike.
Përmes një postimi në rrjetet sociale, Abdixhiku tha se së bashku me 18 deputetët e LDK-së kanë diskutuar për rrugëtimin e përbashkët politik.
“Me 18 deputetët e LDK-së, në përcaktimin e rrugëtimit të përbashkët përpara. Paçi fat e shëndet, në shërbim të Republikës dhe popullit të Kosovës nga nesër e tutje”, ka shkruar Abdixhiku.
Postimi vjen në një moment të rëndësishëm politik, pas takimeve të fundit ndërmjet LDK-së dhe Lëvizjes Vetëvendosje, në kuadër të përpjekjeve për arritjen e një marrëveshjeje për formimin e institucioneve të reja të Kosovës.
