Kryetari i Lidhjes Demokratike të Kosovës (LDK), Lumir Abdixhiku, ka reaguar ashpër pas takimit të liderëve të partive parlamentare, të thirrur nga Albin Kurti, duke e cilësuar si një “farsë politike” pa asnjë qëllim real për zgjidhjen e ngërçit institucional.
“Morëm pjesë me vullnetin më të mirë për të gjetur zgjidhje, por takimi ishte farsë. Qëndrimet e Kurtit ishin të njëjta si më parë dhe as nuk e respektonin e as nuk e interpretonin siç duhet aktgjykimin e Gjykatës Kushtetuese,” u shpreh Abdixhiku pas përfundimit të takimit.
Sipas tij, përgjegjësia për formimin e shumicës parlamentare bie mbi kryetarin e Vetëvendosjes, por bashkë me të vjen edhe përgjegjësia për krizën aktuale. “Kurti e pranoi që nuk ka shumicën. Ai kërkoi kushtëzime të papranueshme, si votimi i fshehtë dhe një propozim të përçudnuar për të votuar në pako kryetarin dhe nënkryetarin e Kuvendit,” deklaroi Abdixhiku.
Reagimi i liderit të LDK-së vjen në kohën kur Kuvendi i Kosovës vazhdon të jetë i pakonstituuar pas disa tentativave të dështuara për zgjedhjen e kryetarit dhe udhëheqësisë së re, ndërsa vendimi i Gjykatës Kushtetuese ka vënë afat 30-ditor për përmbylljen e këtij procesi.
