Kryetari i Partisë Demokratike të Kosovës (PDK), Memli Krasniqi, ka kritikuar ashpër liderin e Vetëvendosjes, Albin Kurti, pas takimit të liderëve të partive parlamentare, duke thënë se Kurti vazhdon të “jetojë në një realitet alternativ” dhe se interpretimi i tij i aktgjykimit të Gjykatës Kushtetuese është i “çuditshëm”.
“Sipas Kurtit, asgjë nuk ka ndodhur gabim gjatë seancës konstituive dhe procesit të votimit, edhe pse pika e parë e dispozitivit të aktgjykimit thotë qartë se seanca nuk është mbajtur në përputhje me Kushtetutën,” deklaroi Krasniqi para mediave pas takimit.
Ai theksoi se Vetëvendosja po injoron detyrimet që rrjedhin nga vendimi i Kushtetueses dhe po tenton ta vazhdojë procesin me të njëjtin skenar të mëparshëm. “Ne i kërkuam që, duke iu përmbajtur aktgjykimit, të ndalojnë përpjekjen për formimin e komisionit për votim të fshehtë dhe të kthehen aty ku seanca ishte ndërprerë — te votimi i hapur për kandidaten për kryetar të Kuvendit,” u shpreh Krasniqi.
Kreu i PDK-së tha se partia e tij ka bërë një ofertë të qartë për të dalë nga ngërçi institucional. “Kushdo që nuk ka qenë ministër në qeverinë e kaluar mund të jetë kandidat për kryetar Kuvendi, por duket se Vetëvendosja nuk është e interesuar për zgjidhje,” shtoi ai.
Ai paralajmëroi se çdo tentativë për të vazhduar nesër me votimin e fshehtë përmes komisionit, do të përbënte “shkelje kushtetuese” nga ana e deputetëve. “Nesër nuk do të jetë njëjtë. Deputetët që votojnë për komisionin do të jenë në kundërshtim me aktgjykimin e Kushtetueses,” përfundoi Krasniqi.
