Ish-nënkryetari i Lidhja Demokratike e Kosovës, Agim Veliu, ka njoftuar se ka refuzuar të jetë pjesë e listës së kandidatëve për deputetë në zgjedhjet parlamentare të 7 qershorit.
Në një reagim publik, Veliu ka kritikuar ashpër lidershipin aktual të LDK-së, duke e akuzuar për përçarje të partisë, largim nga identiteti tradicional rugovian dhe “OJQ-izim politik”.
“Bashkimi i madh” nën kritika
Veliu tha se po habitet me atë që po prezantohet nga partia si “Bashkimi i madh”, duke theksuar se shumë figura që dikur ishin anatemuar dhe larguar nga strukturat e partisë, tani po rikthehen si pjesë e projektit politik të udhëheqjes aktuale.
Ai zbuloi se para zgjedhjeve të 28 dhjetorit 2025 kishte shprehur gatishmëri për të kandiduar për deputet, por sipas tij, kandidatura ishte refuzuar me arsyetimin se ishte “vendim i shefit të madh”, duke iu referuar kryetarit të partisë Lumir Abdixhiku.
“Sot e njëjta kryesi, me bekimin e shefit, më paska propozuar të jem në listën e kandidatëve për deputetë. Madje pa më kontaktuar dhe pa më konsultuar fare”, shkroi Veliu.
“Nuk largohem nga LDK-ja”
Pavarësisht refuzimit të kandidaturës, Veliu tha se nuk po largohet nga Lidhja Demokratike e Kosovës, duke theksuar se partia është pjesë e jetës së tij politike që nga themelimi.
Ai deklaroi se nuk dëshiron të bëhet pjesë e një projekti që, sipas tij, po e largon LDK-në nga identiteti institucional dhe shtetformues.
“LDK është më e madhe se interesat meskine të dy njerëzve”, shkroi ndër të tjera Veliu, duke përfunduar mesazhin me thirrjen: “Zoti e ruajt LDK-në!”.