Një aksident me pasoja fatale ka ndodhur në orët e hershme të mëngjesit të sotëm në fshatin Pouskë të Prizrenit, ku një vajzë 19-vjeçare ka humbur jetën, ndërsa dy persona të tjerë kanë mbetur të lënduar.
Zëdhënësi i Policisë së Kosovës për rajonin e Prizrenit, Shaqir Bytyqi, ka konfirmuar se aksidenti ka ndodhur rreth orës 04:19 të mëngjesit të së shtunës, më 18 maj 2025. Sipas tij, bëhet fjalë për një vetaksident, ku automjeti ka dalë nga rruga, duke shkaktuar pasoja tragjike.
“Si pasojë e aksidentit, tre persona kanë pësuar lëndime. Njëri prej tyre, një femër 19-vjeçare, ka ndërruar jetë nga plagët e marra. Një tjetër, mashkull 25-vjeç, ka pësuar lëndime të rënda, ndërsa personi i tretë, 27 vjeç, ka marrë lëndime të lehta trupore,” tha Bytyqi.
Në vendin e ngjarjes kanë intervenuar njësitet emergjente, përfshirë patrullat e trafikut rajonal, zjarrfikësit, hetuesit dhe Prokurori kujdestar, të cilët kanë nisur hetimet për të zbardhur shkaqet e aksidentit.
Policia ka bërë thirrje për kujdes të shtuar në trafik, veçanërisht gjatë orëve të natës dhe mëngjesit herët, kur rreziku nga aksidentet është më i lartë.
