22 tetor 2025 — Sot në Londër po mbahet Samiti i Liderëve të Procesit të Berlinit, ngjarja përmbyllëse e këtij viti që mbledh krerët e qeverive të vendeve të Ballkanit Perëndimor.
Ambasada e Gjermanisë në Kosovë njofton se samiti pason një vit përgatitjesh intensive dhe ka për qëllim të sjellë “momentum të ri, rezultate të prekshme dhe një vizion të përbashkët për të ardhmen e Ballkanit Perëndimor në Evropë.”
Procesi i Berlinit, i nisur nga Gjermania në vitin 2014, mbështet aspiratat e gjashtë vendeve të Ballkanit Perëndimor për anëtarësim në Bashkimin Evropian dhe forcon bashkëpunimin ndërmjet tyre.
“Ky proces sjell përmirësime të dukshme në jetën e qytetarëve, si heqja e tarifave të roamingut dhe njohja e ndërsjellë e kualifikimeve profesionale dhe akademike,” thuhet në komunikatë.
Ambasada thekson se reformat janë mjet për të forcuar sundimin e ligjit, demokracinë dhe luftën kundër korrupsionit, duke sjellë përfitime të drejtpërdrejta për shoqërinë.
“Një Ballkan Perëndimor i sigurt nënkupton një Evropë të sigurt. Bashkëpunimi i ngushtë forcon jo vetëm secilin vend të rajonit, por edhe interesat e përbashkëta të BE-së dhe Mbretërisë së Bashkuar,” përfundon njoftimi.
