Ish-tenisti britanik Andy Murray do të nderohet me një statujë në kompleksin e famshëm të Wimbledonit në vitin 2027, njoftoi sot transmetuesi britanik BBC.
Murray, i cili është 38 vjeç, përfundoi karrierën e tij si lojtar profesionist në vitin 2024, pas pjesëmarrjes në Lojërat Olimpike në Paris.
“Dëshirojmë që në Wimbledon të kemi një statujë të Andy Murray. Jemi duke bashkëpunuar ngushtë me të dhe ekipin e tij,” deklaroi presidentja e All England Club, Debbie Jevans. Ajo shtoi se statuja pritet të përfundojë deri në vitin 2027.
“Qëllimi ynë është që ta prezantojmë këtë nismë në përvjetorin e 150-të të kampionatit tonë të parë, i cili u mbajt në vitin 1877. Murray dhe ekipi i tij do të jenë të përfshirë në këtë proces me të drejtë të plotë,” shtoi Jevans.
Andy Murray ka fituar dy tituj të mëdhenj në Wimbledon, përkatësisht në vitet 2013 dhe 2016, duke u bërë një nga figurat më të rëndësishme në historinë e këtij turneu prestigjioz.
