Agjencia e Menaxhimit Emergjent (AME) ka lëshuar një thirrje urgjente për kujdes të shtuar nga zjarret, duke paralajmëruar për rrezik të lartë zjarresh gjatë stinës së verës, kur temperaturat arrijnë vlera ekstreme.
Zjarret në pyje, fusha dhe hapësira të hapura jo vetëm që shkaktojnë dëme të konsiderueshme materiale, por rrezikojnë drejtpërdrejt jetën e qytetarëve, ndotin ajrin, dhe shkatërrojnë florën dhe faunën vendore.
ZJARRVËNIA – VEPËR PENALE
AME thekson se çdo zjarrvënie, qoftë nga pakujdesia apo me qëllim, përbën shkelje të rëndë penale dhe sanksionohet me ligj.
“Çdo person që shkakton zjarr dhe dëmton pronën publike ose private, apo vë në rrezik jetën e qytetarëve dhe mjedisin, do të përballet me ndjekje penale dhe masa të rrepta ndëshkuese,” thuhet në njoftimin e agjencisë.
Në rast zjarri apo rreziku të mundshëm, qytetarët janë të ftuar të reagojnë menjëherë duke njoftuar autoritetet përkatëse:
-
Qendra Operative Emergjente – 112
-
Shërbimi Zjarrfikës – 193
-
Policia e Kosovës – 192
AME apelon për vigjilencë dhe bashkëpunim qytetar, duke kujtuar se çdo veprim i përgjegjshëm ndihmon në ruajtjen e jetës, pronës dhe natyrës së vendit.
“Bashkë për siguri, jetë dhe mjedis – secili prej nesh ka një rol të rëndësishëm në parandalimin e fatkeqësive. Veprimi juaj i shpejtë mund të shpëtojë jetë,” thuhet në fund të thirrjes.
Mos ndezni zjarr. Mbroni natyrën. Mbroni jetën.
