Një praktikante në selinë strategjike të NATO-s për Operacionet Aleate në Evropë (SHAPE) është arrestuar nga autoritetet belge nën dyshimin për spiunazh dhe përfshirje në një organizatë kriminale.
Sipas Zyrës së Prokurorit Federal të Belgjikës, gruaja dyshohet se “ka vepruar në emër të një vendi të tretë dhe ishte anëtare e një organizate kriminale”.
E dyshuara është një shtetase kanadeze me origjinë kineze, e cila kishte tërhequr vëmendjen e shërbimeve të sigurisë së SHAPE, strukturës së NATO-s me seli në Mons të Belgjikës.
Autoritetet belge kryen kontrolle në banesën dhe zyrën e saj të enjten, ndërsa më pas u bë arrestimi.
Prokuroria Federale belge nuk ka dhënë detaje të tjera lidhur me natyrën e dyshimeve, vendin për të cilin pretendohet se ka punuar apo informacionet që ajo dyshohet se ka siguruar.
Hetimet po vazhdojnë, ndërsa rasti vjen në një kohë kur institucionet e sigurisë evropiane kanë rritur vëmendjen ndaj kërcënimeve të mundshme të spiunazhit dhe ndërhyrjeve të huaja në strukturat strategjike.