Shoferët që udhëtojnë në autostradat sllovene kanë paralajmëruar për kontrolle të shtuara policore gjatë ditëve të fundit, veçanërisht në aksin mes Lubjanës dhe Novi Mestos.
Sipas raportimeve të disa drejtuesve të automjeteve, një Audi i ri me targa sllovene është vërejtur duke patrulluar në trafik dhe duke monitoruar sjelljen e shoferëve, sidomos gjatë orëve kur krijohen kolona të mëdha.
Disa lexues kanë deklaruar se automjeti policor është parë rreth orës 15:00 në dalje të Lubjanës drejt Novi Mestos, në një moment kur trafiku ishte i ngarkuar. Sipas tyre, automjeti ka ndjekur shoferët që kryenin manovra të rrezikshme, si ndryshime të papërshtatshme të korsive, mungesë sinjalizimi, mosrespektim të distancës së sigurisë apo tentime për të kaluar kolonat në mënyrë të palejuar.
Një shofer ka publikuar edhe një urdhër kundërvajtjeje, ku thuhet se është gjobitur me 160 euro për shkelje të rregullave të trafikut. Nëse gjoba paguhet brenda afatit ligjor, shoferi ka mundësi të paguajë vetëm gjysmën e shumës, pra 80 euro.
Sllovenia me kontrolle të rrepta në trafik
Në vitet e fundit, autoritetet sllovene kanë forcuar masat për sigurinë rrugore, duke përdorur automjete të shënuara dhe të pashënuara për monitorimin e trafikut në autostrada dhe rrugë të tjera.
Policia i kushton vëmendje të veçantë shkeljeve që konsiderohen si faktorë kryesorë të aksidenteve, përfshirë:
- ndryshimet e papritura të korsive;
- tejkalimet e palejuara;
- mosmbajtjen e distancës së sigurisë;
- tejkalimin e shpejtësisë;
- përdorimin e telefonit gjatë drejtimit të automjetit.
Gjobat e larta për shkeljet rrugore
Sllovenia konsiderohet ndër vendet me dënimet më të larta në rajon për shkeljet e trafikut.
Për tejkalimin e shpejtësisë në autostradë, gjobat mund të jenë:
- deri në 20 km/h mbi kufirin e lejuar – 40 euro;
- nga 20 deri në 30 km/h – 60 euro;
- nga 30 deri në 40 km/h – 120 euro;
- nga 40 deri në 50 km/h – 250 euro dhe pikë penalizuese;
- mbi 60 km/h mbi kufirin e lejuar – deri në 1,200 euro, së bashku me masa shtesë.
Dënime të ngjashme të larta parashihen edhe për drejtimin nën ndikimin e alkoolit apo substancave narkotike. Në varësi të nivelit të alkoolit në gjak, gjobat mund të arrijnë deri në 1,200 euro, ndërsa mund të shoqërohen edhe me heqje të patentës.
Apeli për shoferët gjatë sezonit veror
Autoritetet u bëjnë thirrje shoferëve që udhëtojnë përmes Sllovenisë, sidomos gjatë sezonit turistik, të respektojnë rregullat e trafikut, të përdorin sinjalizuesit gjatë ndryshimit të drejtimit, të mbajnë distancën e sigurisë dhe të përshtatin shpejtësinë me kushtet në rrugë.
Me rritjen e numrit të turistëve dhe ngarkesën më të madhe në autostrada gjatë muajve të verës, kontrollet policore pritet të vazhdojnë të jenë më të shpeshta.
