Presidenti i Shqipërisë, Bajram Begaj, ka bërë thirrje për ruajtjen dhe kultivimin e gjuhës shqipe, duke theksuar rëndësinë e saj për identitetin dhe kulturën kombëtare.
Në një mesazh të publikuar së fundmi, Begaj u shpreh se gjuha amtare duhet të ruhet, të përcillet ndër breza dhe të flitet me kujdes e dashuri nga të gjithë shqiptarët.
“Ta duam, ta ruajmë, ta përcjellim brez pas brezi dhe ta flasim bukur gjuhën tonë amtare”, theksoi presidenti.
Begaj falënderoi nxënësit dhe mësuesit e shkollës 9-vjeçare “Selim Alliu” në Peshkopi për video-mesazhin e dërguar, duke i përgëzuar për angazhimin e tyre në promovimin e gjuhës shqipe.
Kjo shkollë është gjithashtu fituesja aktuale e konkursit kombëtar të gjuhës shqipe, një garë që synon të nxisë dashurinë dhe përkushtimin e të rinjve ndaj gjuhës dhe kulturës shqiptare.
Presidenti vlerësoi punën e mësuesve dhe përkushtimin e nxënësve, duke theksuar se edukimi dhe kujdesi për gjuhën janë themel për ruajtjen e identitetit kombëtar dhe për zhvillimin e brezave të ardhshëm.