Në një deklaratë të fortë pas sulmeve ajrore të SHBA-së ndaj objekteve bërthamore të Iranit, Kancelari gjerman Friedrich Merz i kërkoi Teheranit të rikthehet menjëherë në tryezën e negociatave, duke paralajmëruar për rrezikun e përshkallëzimit të mëtejshëm të konfliktit në Lindjen e Mesme.
“Irani duhet të hyjë menjëherë në negociata me SHBA-në dhe Izraelin dhe të gjejë një zgjidhje diplomatike për konfliktin aktual,” deklaroi Merz përmes zëdhënësit të tij, Stefan Kornelius.
Gjermania: Programi bërthamor iranian i dëmtuar rëndë
Qeveria gjermane konfirmoi se, sipas vlerësimeve fillestare, “pjesë të mëdha të programit bërthamor të Iranit janë dëmtuar nga sulmet ajrore të natës”, duke iu referuar bombardimeve të koordinuara në Fordow, Natanz dhe Esfahan të kryera nga avionët amerikanë B-2.
Berlinin e shqetëson jo vetëm ndikimi i drejtpërdrejtë i sulmeve mbi infrastrukturën bërthamore, por edhe rreziku real i përhapjes së konfliktit në të gjithë rajonin, në një kohë kur frika për hakmarrje nga Irani ndaj SHBA-së dhe Izraelit është në rritje.
Merz: Diplomacia, e vetmja rrugëdalje
Kancelari gjerman theksoi se zgjidhja e vetme afatgjatë mbetet rruga diplomatike, duke i bërë thirrje Teheranit të lërë mënjanë përshkallëzimin dhe të angazhohet për stabilitet dhe siguri rajonale.
Apeli i Berlinit vjen vetëm pak orë pasi Presidenti i SHBA-së, Donald Trump, deklaroi sulmin si një “sukses historik ushtarak”, duke e cilësuar shkatërrimin e objektivave bërthamore si një hap vendimtar në frenimin e ambicieve të Iranit.
Tensionet në rritje
Tensioni mes Uashingtonit dhe Teheranit ka arritur nivele të reja, teksa kërcënimet për hakmarrje nga Irani kanë ngritur shqetësimet për një luftë të gjerë rajonale, që mund të përfshijë vendet fqinje dhe të kërcënojë stabilitetin global.
Ndërkohë, aktorë ndërkombëtarë, përfshirë Bashkimin Evropian dhe OKB-në, pritet të intensifikojnë përpjekjet për të rikthyer palët në dialog dhe për të shmangur një përplasje të plotë ushtarake në zemër të Lindjes së Mesme.
