Procesi i konstituimit të legjislaturës së nëntë të Kuvendit të Kosovës vijon të mbetet i bllokuar, pasi për të dytën herë me radhë deputetët nuk arritën të krijojnë një komision për organizimin e votimit të fshehtë për zgjedhjen e kryeparlamentarit të ri. Seanca pritet të vazhdojë të hënën, më 5 maj, në orën 10:00.
Në seancën e dhjetë me radhë të këtij procesi, partitë opozitare – Partia Demokratike e Kosovës (PDK), Lidhja Demokratike e Kosovës (LDK), Aleanca për Ardhmërinë e Kosovës (AAK) dhe Lista Serbe – refuzuan sërish të propozojnë përfaqësues për komisionin që do të mbikëqyrte votimin e fshehtë.
Përpjekje për të zhbllokuar situatën kishte bërë më 1 maj kryetari i Lëvizjes Vetëvendosje (LVV), Albin Kurti, i cili ftoi në takim drejtuesit e PDK-së dhe LDK-së. Megjithëse kreu i PDK-së, Memli Krasniqi, pranoi ftesën, pas takimit nuk pati ndonjë marrëveshje për zgjidhjen e ngërçit.
Problemi qëndron tek kandidatura e Albulena Haxhiut për postin e kryetares së Kuvendit. Ajo nuk ka arritur të sigurojë mbështetjen e nevojshme – 61 vota – në gjashtë raunde votimi. Opozita e konsideron Haxhiun si figurë përçarëse dhe ka kërkuar nga LVV-ja një emër tjetër. AAK-ja ka përmendur Saranda Bogujevcin dhe Shqipe Selimin si kandidate të pranueshme, ndërsa LDK ka refuzuar mbështetjen për çdo propozim të LVV-së.
Vetëvendosje ka këmbëngulur se Haxhiu është kandidate meritore dhe ka refuzuar të tërheqë emrin e saj. Ajo ka propozuar që së bashku me nënkryetarët e Kuvendit të votohet në një pako, për të ecur përpara në formimin e institucioneve.
Kuvendi, i konstituar pjesërisht më 15 prill, ka kaluar vetëm dy pika të rendit të ditës: verifikimin e mandateve dhe betimin e deputetëve. Procesi është bllokuar në pikën e tretë – zgjedhjen e kryeparlamentarit – që është kusht për formimin e Qeverisë së re.
Bashkësia ndërkombëtare, përfshirë Bashkimin Evropian dhe ambasadorin gjerman në Kosovë, Jorn Rohde, kanë kërkuar urgjentisht krijimin e institucioneve të reja. Ata kanë bërë thirrje për vendosjen e interesit shtetëror mbi atë partiak.
Nëse LVV, si fituese e zgjedhjeve të 9 shkurtit me 48 ulëse, nuk arrin të sigurojë shumicën për formimin e qeverisë, presidentja Vjosa Osmani mund të mandatojë një tjetër subjekt politik që garanton 61 vota. Nëse dështon edhe tentativa e dytë, atëherë vendi do të shkojë në zgjedhje të reja.
Ngërçi institucional po rrit presionin politik brenda dhe jashtë vendit, ndërsa mbetet për t’u parë nëse seanca e së hënës do të sjellë ndonjë ndryshim vendimtar.
