Një lajm me interes të veçantë për mijëra bashkëatdhetarë që jetojnë dhe punojnë në Austri vjen nga sistemi austriak i tatimeve dhe sigurimeve shoqërore. Edhe gjatë këtij viti, punonjësit dhe pensionistët me të ardhura më të ulëta mund të përfitojnë një rimbursim financiar që në disa raste arrin deri në 1,398 euro për person.
Sipas të dhënave të publikuara nga mediat austriake, qytetarët që paguajnë pak ose aspak tatim mbi të ardhurat kanë të drejtë të përfitojnë nga i ashtuquajturi “bonus i sigurimeve shoqërore” apo “taksa negative”, përmes së cilës shteti u kthen një pjesë të kontributeve të paguara.
Kjo masë pritet të jetë veçanërisht e rëndësishme për shumë shqiptarë që jetojnë në Austri, sidomos për punëtorët me paga më të ulëta, familjet me fëmijë, prindërit e vetëm dhe pensionistët.
Për vitin tatimor 2025, punonjësit mund të përfitojnë deri në 1,277 euro si rimbursim i sigurimeve shoqërore, ndërsa për ata që përfitojnë edhe shtesën për udhëtimin në punë, shuma mund të arrijë deri në 1,398 euro. Pensionistët, ndërkaq, mund të marrin deri në 710 euro.
Një përfitim shtesë vlen edhe për familjet me fëmijë. Kredia tatimore për fëmijë është rritur në 700 euro për secilin fëmijë, duke ofruar mbështetje më të madhe për familjet me të ardhura të kufizuara.
Autoritetet austriake bëjnë të ditur se deklarimi individual i tatimeve shpesh sjell përfitime më të mëdha sesa vlerësimi automatik, prandaj qytetarët këshillohen të kontrollojnë të drejtat e tyre dhe të paraqesin deklaratat tatimore në afatet e përcaktuara.
Për bashkëatdhetarët shqiptarë që jetojnë në Austri, kjo paraqet një mundësi konkrete për të rikuperuar qindra apo edhe mbi një mijë euro nga kontributet e paguara gjatë vitit të kaluar. Ekspertët fiskalë atje rekomandojnë që secili punonjës apo pensionist të verifikojë statusin e tij, pasi në shumë raste rimbursimet mund të jenë më të larta nga sa pritet.
Po ashtu, qytetarët që ende nuk kanë paraqitur kërkesat për vitet e mëparshme kanë mundësi të aplikojnë në mënyrë retroaktive, duke mos humbur të drejtën për përfitimet që u takojnë sipas legjislacionit austriak.
