Komisioni Evropian ka vlerësuar se Bullgaria është gati të bëhet vendi i 21-të i Bashkimit Evropian që adoptuar monedhën euro, duke plotësuar të gjitha kriteret e nevojshme për anëtarësim në eurozonë. Në një raport të fundit, Komisioni thekson përparimet e konsiderueshme të vendit, veçanërisht në uljen e inflacionit nga mbi 9.5% në 2.7% gjatë vitit të kaluar.
Sipas parashikimeve të Komisionit, inflacioni në Bullgari pritet të bjerë në nivelin 1.8% deri në vitin 2026. Banka Qendrore Evropiane konfirmoi se vendi i përmbush tashmë katër kriteret kryesore të eurozonës: stabilitetin e çmimeve, financat publike të qëndrueshme, kursin e këmbimit të qëndrueshëm dhe normat e interesit afatgjatë.
Bullgaria, e cila është anëtare e BE-së që nga viti 2007, po ndjek gjurmët e Kroacisë, vendi i fundit që iu bashkua eurozonës më 1 janar 2023. Anëtarësimi në eurozonë do t’i japë Bullgarisë akses në politikat monetare të Bankës Qendrore Evropiane dhe do të rrisë mbështetjen financiare, duke reduktuar rreziqet monetare për vendin.
Përdorimi i euros pritet të sjellë përfitime të ndjeshme: uljen e normave të interesit për qeverinë dhe bizneset, eliminimin e rrezikut të këmbimit valutor dhe rritjen e besimit të investitorëve. Transaksionet ndërkufitare do të thjeshtohen, duke lehtësuar tregtinë dhe turizmin me shtetet e tjera të BE-së.
Presidentja e Komisionit Evropian, Ursula von der Leyen, e përshkroi euron si “simbol të prekshëm të forcës dhe unitetit evropian”, ndërsa kryeministri bullgar Rossen Jeliazkov tha se ky është një moment historik për vendin. “Një ditë e jashtëzakonshme. Një hap tjetër përpara pas vitesh reformash dhe angazhimi,” shkroi ai në një postim në rrjetin social X.
Protesta dhe kundërshtime brenda vendit
Pavarësisht përparimeve, procesi i adoptimit të euros ka shkaktuar pakënaqësi dhe tensione në opinionin publik. Në qytete si Sofja janë mbajtur protesta, disa prej tyre edhe të dhunshme, kundër hyrjes në eurozonë. Sondazhet e fundit tregojnë se rreth gjysma e qytetarëve bullgarë kundërshtojnë këtë hap.
Partia opozitare pro-ruse “Vazrazhdane” ka qenë në ballë të protestave, duke argumentuar se miratimi i euros mund të dëmtojë ekonominë dhe kursimet e qytetarëve. “Nëse Bullgaria i bashkohet eurozonës, do të jetë si të hipësh në Titanik,” tha një protestues në Sofje.
Megjithatë, institucionet evropiane dhe qeveria bullgare mbeten të vendosura që procesi të ecë përpara, duke e parë euron si një hap kyç drejt konsolidimit ekonomik dhe politik të vendit brenda BE-së.
