Bananet janë një nga frutat më të konsumuara në botë, jo vetëm për shijen e tyre të ëmbël dhe prakticitetin, por edhe për përfitimet që ofrojnë për shëndetin. Konsumimi i përditshëm i bananeve, sidomos në kombinim me yndyrna apo proteina të shëndetshme, mund të ndikojë pozitivisht në nivelet e energjisë dhe mirëqenien e përgjithshme të trupit.
Burim energjie dhe stabilizues i sheqerit në gjak
Bananet përmbajnë karbohidrate të shëndetshme që shërbejnë si burim kryesor energjie për trupin. Ato janë të pasura me vitamina B3, B6 dhe B12, të cilat ndihmojnë në çlirimin e energjisë nga karbohidratet. Megjithatë, për të shmangur rritjen e menjëhershme të nivelit të sheqerit në gjak, ekspertët këshillojnë që bananet të konsumohen së bashku me proteina ose yndyrna të shëndetshme – si p.sh. një grusht bajame ose një filxhan kos grek.
Ndihmojnë në mbajtjen e një peshe të shëndetshme
Edhe pse nuk ka prova të drejtpërdrejta që bananet shkaktojnë humbje peshe, ato ndihmojnë në kontrollin e oreksit për shkak të përmbajtjes së lartë të fibrave. Një studim i vitit 2023 në Frontiers in Nutrition tregoi se rritja e marrjes së fibrave nga frutat lidhet me humbje më të suksesshme peshe.
Të pasura me fibra që përmirësojnë tretjen
Një banane e mesme përmban rreth 3 gramë fibra. Përveç kësaj, bananet përmbajnë pektinë dhe niseshte rezistente – dy lloje fibrash që ndihmojnë në tretje dhe mbështesin shëndetin e zorrëve duke ushqyer bakteret e dobishme. Bananet më pak të pjekura janë më të pasura me këto përbërës.
Mbrojnë shëndetin e zemrës
Me rreth 420 mg kalium për çdo banane të mesme, ky frut kontribuon ndjeshëm në funksionimin normal të zemrës dhe në uljen e presionit të gjakut. Dietat e pasura me kalium, si dieta DASH, janë veçanërisht të rekomanduara për personat në rrezik nga sëmundjet kardiovaskulare.
Reduktojnë rrezikun e sëmundjeve kronike
Sipas një studimi të publikuar në International Journal of Food Properties në vitin 2022, bananet janë të pasura me antioksidantë që luftojnë stresin oksidativ. Ky stres është një faktor i rëndësishëm në zhvillimin e sëmundjeve kronike si sëmundjet e zemrës, diabeti dhe kanceri. Antioksidantët ndihmojnë në parandalimin e inflamacionit dhe mbrojtjen e qelizave nga dëmtimi.
Sa banane duhet të hani në ditë?
Ekspertët sugjerojnë se një deri në dy banane në ditë janë të mjaftueshme për të përfituar nga vlerat e tyre ushqyese. Megjithatë, njerëzit me probleme të veshkave duhet të jenë të kujdesshëm me konsumimin e tepërt të ushqimeve të pasura me kalium, siç janë bananet. Hiperkalemia – një nivel i lartë kaliumi në gjak – mund të shkaktojë probleme serioze shëndetësore, përfshirë edhe çrregullime në ritmin e zemrës.
Në përfundim, bananet janë një zgjedhje e shkëlqyer për një dietë të shëndetshme, për sa kohë konsumohen me moderim dhe si pjesë e një regjimi ushqimor të balancuar.
