Deputeti i Partisë Demokratike të Kosovës, Abelard Tahiri, ka kërkuar pezullimin e menjëhershëm të vendimit të Zyrës së Rregullatorit për Energji (ZRRE) që parashikon daljen e bizneseve në tregun e lirë të energjisë elektrike më 1 qershor 2025. Ai paralajmëron se kjo masë do të përkeqësojë edhe më tej situatën ekonomike në vend, raporton Ekonomia OnLine.
Në një konferencë për media, Tahiri theksoi se çmimet alarmante të energjisë elektrike janë rezultat i ankandeve të manipuluara dhe përfitimeve të mëdha për kompani të lidhura me Qeverinë Kurti.
“Partia Demokratike e Kosovës kërkon një auditim të jashtëzakonshëm nga Zyra Kombëtare e Auditimit dhe auditorë të pavarur për ankandet, përfituesit dhe shumat e shpenzuara; pezullim të menjëhershëm të vendimit për daljen e bizneseve në tregun e lirë; si dhe hetim të thelluar nga Prokuroria Speciale për të gjithë zyrtarët dhe aktorët e përfshirë në këtë skandal,” tha Tahiri.
Ai gjithashtu theksoi se pas tre vitesh bllokimi nga shumica parlamentare për të lejuar hetimin e sektorit të energjisë, qytetarët e Kosovës kanë të drejtë të dinë të vërtetën mbi keqpërdorimet që ndikojnë negativisht në jetën dhe ekonominë e tyre.
Tahiri përmendi edhe rastin konkret të rritjes ekstreme të çmimit të energjisë, ku brenda vetëm një dite, çmimi i transmetimit u rrit nga 2 në 798 euro për megavat-orë (MWh), duke shkaktuar dëme prej mbi 1 milion euro në vetëm 6 orë për buxhetin e vendit.
Ky apel vjen në një moment kritik për sektorin energjetik dhe kërkon ndërhyrje të menjëhershme për të parandaluar pasoja më të rënda ekonomike për qytetarët dhe bizneset në Kosovë.
