Protesta kundër projektit të planifikuar në Zvërnec ka hyrë në ditën e saj të tetë, ndërsa qindra qytetarë u mblodhën sërish para Kryeministrisë duke kërkuar anulimin e projektit, dorëheqjen e qeverisë dhe ndryshime të thella në skenën politike shqiptare.
Protestuesit marshuan nga Sheshi “Skënderbej” drejt Kryeministrisë me thirrje si “Dorëheqje”, “Rama në burg, Berisha në burg”, duke shprehur pakënaqësi jo vetëm ndaj qeverisë aktuale, por ndaj gjithë klasës politike që ka dominuar vendin në dekadat e fundit.
Sipas pjesëmarrësve, kauza e mbrojtjes së natyrës në Zvërnec është shndërruar në një platformë më të gjerë proteste, ku janë ngritur shqetësime për emigrimin masiv, gjendjen në arsim e shëndetësi, sistemin e drejtësisë dhe çështjet e pronësisë.
Një nga momentet simbolike të protestës ishte vendosja e një gomoneje para Kryeministrisë, me mesazhin se emigrimi nuk duhet të jetë zgjidhje për të rinjtë shqiptarë. Protestuesit theksuan se largimi i qytetarëve nga vendi mbetet një nga plagët më të mëdha sociale të Shqipërisë.
Në tubim pati edhe thirrje të forta drejtuar figurave kryesore politike. Disa pjesëmarrës kërkuan largimin e Edi Rama dhe Sali Berisha, duke i konsideruar përgjegjës për situatën politike dhe ekonomike në vend.
Një zhvillim i ri i protestës ishte artikulimi publik i idesë për krijimin e një force të re politike. Disa protestues propozuan themelimin e një partie të re, e cila sipas diskutimeve paraprake mund të mbajë emrin “Shqipëria e Re”. Po ashtu, u hodhën edhe ide për krijimin e një qeverie teknike si zgjidhje për tejkalimin e krizës politike.
Protestuesit kanë paralajmëruar vazhdimin e mobilizimit qytetar dhe kanë bërë thirrje për një tubim mbarëkombëtar më 10 qershor në Tiranë, duke ftuar qytetarë nga të gjitha qytetet e vendit t’u bashkohen kërkesave të tyre.
Kërkesat kryesore të protestuesve:
- Dorëheqja e qeverisë;
- Shfuqizimi i statusit dhe kuadrit ligjor për investitorët strategjikë;
- Shfuqizimi i Paketës së Maleve;
- Anulimi i ndryshimeve në ligjin për zonat e mbrojtura;
- Anulimi i ndryshimeve në ligjin për trashëgiminë kulturore.
Protesta e nisur për mbrojtjen e zonës së Zvërnecit po merr gjithnjë e më shumë karakter politik e qytetar, me organizatorët që synojnë ta shtrijnë mobilizimin në nivel kombëtar në ditët në vijim.
