Deputetja nga komuniteti boshnjak, Duda Balje, ka bërë të ditur se do të qëndrojë në opozitë, duke theksuar se vota e saj nuk është vendimtare për zgjedhjen e kryetarit të Kuvendit dhe formimin e Qeverisë së re.
Në një lidhje direkte në emisionin “Kallxo Përnime”, Balje tha se ky vendim është marrë nga kryesia e subjektit që ajo përfaqëson dhe nuk pret që situata të ndryshojë.
“Edhe nëse unë qëndroj në opozitë, nuk do të ndryshojë asgjë. Jam e bindur që Vetëvendosje do të gjejë zgjidhje. Ne sot kemi vendosur që të shkojmë në opozitë dhe nuk besoj se do të ketë ndonjë ndryshim,” deklaroi ajo.
Deputetja Balje sqaroi se gjatë gjithë kësaj periudhe ka pasur vetëm një takim me kryeministrin Albin Kurti, takim i cili, sipas saj, ishte zhvilluar bashkë me Emilja Rexhepin. Ajo tha se në këtë takim i ishte ofruar një pozitë ministrore, por që kërkesa e saj kryesore nuk kishte qenë ndonjë post qeveritar.
“Unë kam marrë pjesë vetëm në një takim me kryeministrin, së bashku me Emilja Rexhepin. Në atë takim më është bërë propozimi për ministre, por nuk kemi pasur më takime të tjera. Kërkesa ime nuk ka qenë për post, por për fillimin e procesit për krijimin e një komune me shumicë boshnjake në Kosovë,” theksoi Balje.
Ajo shtoi se është e vetëdijshme që formimi i një komune të re është proces i gjatë dhe i ndërlikuar, dhe sipas saj, Kurti është shumë kundër kësaj ideje.
“E di që formimi i komunës është një proces që mund të zgjasë 4 deri në 5 vjet. Nga ajo që kam kuptuar nga kryeministri, ai është shumë kundër kësaj ideje. Votimi në Kuvend është faza e fundit, dhe edhe nëse nuk kalon, është në rregull. Unë nuk mund të ushtroj presion për vota,” shtoi ajo.
Balje përfundoi duke thënë se gjatë mandatit të saj të kaluar ka pasur bashkëpunim të kufizuar me Lëvizjen Vetëvendosje, duke përmendur se në katër vitet e fundit ka pasur vetëm një zëvendësministër dhe dy këshilltarë nga komuniteti që ajo përfaqëson.
