E shtuna në Kosovë pritet të sjellë një ndryshim të ndjeshëm të motit, pas një periudhe të gjatë me kushte të qeta, të thata dhe temperatura të larta.
Paradite pritet të mbajë kryesisht me diell, jashtëzakonisht nxehtë dhe me zagushi, ndërsa gjatë pasdites atmosfera pritet të destabilizohet fuqishëm.
Zhvillimet konvektive pritet të intensifikohen dhe në pjesë të ndryshme të Kosovës mund të shfaqen rrebeshe shiu të shoqëruara me vetëtima dhe bubullimë. Me kalimin e orëve, këto zhvillime pritet të organizohen dhe të intensifikohen në zona të ndryshme të vendit.
Në zona të caktuara parashihen stuhi të fuqishme lokale, me mundësi për rrebeshe intensive, breshër dhe shkarkesa të fuqishme atmosferike. Megjithatë, intensiteti i reshjeve mund të ndryshojë ndjeshëm nga një zonë në tjetrën.
Temperaturat do të jenë shumë të larta para zhvillimit të stuhive, me maksimalen që pritet të arrijë deri në 38°C. Me ardhjen e rrebesheve, erërave dhe masave më të freskëta ajrore, temperaturat pritet të pësojnë ulje të ndjeshme, sidomos gjatë kohës së reshjeve.
