Një gjykatë në Bolonja ka miratuar ekstradimin e një shtetasi ukrainas në Gjermani, i cili dyshohet se ka qenë një nga organizatorët e sulmeve ndaj tubacioneve të gazit Nord Stream në shtator të vitit 2022.
Sipas mediave italiane, vendimi është marrë pas një beteje të gjatë ligjore mes mbrojtjes dhe autoriteteve gjermane. Avokati i të akuzuarit, Nicola Canestrini, ka bërë të ditur se do të paraqesë një ankesë në Gjykatën e Kasacionit në Romë, e cila mund të rishqyrtojë sërish çështjen.
I dyshuari, Serhij K., u arrestua gjatë verës në bregdetin italian të Adriatikut, ku po pushonte me familjen. Ai është mbajtur që atëherë në një burg të sigurisë së lartë në Itali. Sipas Zyrës së Prokurorisë Federale të Gjermanisë, ai akuzohet për shpërthim në bashkëpunim dhe sabotim të projektit energjetik gjermano-rus Nord Stream 2, që kishte një rëndësi të madhe strategjike për furnizimin me gaz të Evropës.
Fillimisht, gjykata e Bolonjës kishte miratuar ekstradimin në muajin shtator, por Gjykata e Kasacionit e ndaloi përkohësisht procedurën për shkak të parregullsive dhe e ktheu dosjen për rishqyrtim. Pas vendimit të ri, pritet që Serhij K. të dërgohet në Gjermani për t’u përballur me drejtësinë.
Shpërthimet në tubacionet e Nord Stream 1 dhe 2, që ndodhën në afërsi të ishullit danez Bornholm, shkaktuan dëm të madh në infrastrukturën energjetike dhe tërhoqën vëmendjen ndërkombëtare. Ngjarja ndodhi vetëm gjashtë muaj pas fillimit të luftës së Rusisë në Ukrainë, duke nxitur dyshime të shumta mbi autorësinë dhe motivet e sulmit.
Hetimet ndërkombëtare mbi këtë akt sabotimi vijojnë ende, ndërsa ekstradimi i ukrainasit konsiderohet një hap i rëndësishëm në zbardhjen e plotë të rastit.
