Në një takim entuziast me banorët dhe strukturat e Aleancës për Ardhmërinë e Kosovës (AAK) në Klinë, u prezantuan kandidatët për deputetë nga kjo komunë, duke rritur shpresat për mbështetje të gjerë në zgjedhjet e ardhshme. Qytetarët e Klinës treguan përkrahjen e tyre të fortë për vizionin e AAK-së për Kosovën, ku përfshihet edhe objektivi i anëtarësimit në NATO përmes Planit Aksional të propozuar nga kjo parti.
Në listën e kandidatëve për Kuvendin e Kosovës, nga Klina përfaqësohen Prof. Zenun Elezaj, Marqe Selmanaj dhe Dr. Haxhi Ibishi, të cilët shihen si garanci për një përfaqësim dinjitoz dhe të aftë. Prof. Zenun Elezaj, me përvojën e tij në qeverisjen lokale, synon ta sjellë këtë qasje model edhe në Kuvendin e Kosovës. Ndërsa Marqe Selmanaj dhe Dr. Haxhi Ibishi, si profesionistë të dëshmuar, pritet të sjellin përvojën e tyre në shërbim të qytetarëve të Klinës dhe të Kosovës në tërësi.
AAK prezantoi gjithashtu një program të detajuar ekonomik për qeverisjen e ardhshme. Në të parashikohet një vlerë të koeficientit prej 155 eurosh, me një pagë minimale që nuk do të bjerë nën 500 euro dhe një pagë mesatare jo më të ulët se 1,000 euro që në vitin e parë të qeverisjes. Programi përfshin rritje të pagave me 12-13% çdo vit, duke synuar një pagë mesatare prej 1,500 eurosh deri në fund të mandatit në vitin 2028. Për më tepër, përfitimet për pensionistët do të rriten me 50% në vitin 2025 krahasuar me 2024-n, për të ndjekur më tej ritmet e rritjes së pagave.
Mbështetja e qytetarëve për Aleancën dhe për partnerët e saj në koalicion është një sinjal i qartë i besimit për programin e saj, që përfshin synimin për anëtarësim direkt në NATO. Kjo aleancë strategjike konsiderohet një hap kyç për përmirësimin e sistemit arsimor dhe shëndetësor, si dhe për krijimin e mundësive të reja për zhvillim ekonomik të qëndrueshëm.
