Recep Tayyip Erdoğan priti në Stamboll kryeministrin e Pakistanit, Shehbaz Sharif, në një takim ku në fokus ishin marrëdhëniet dypalëshe, zhvillimet rajonale dhe çështjet ndërkombëtare.
Takimi u zhvillua në Pallatin Vahdettin, ku pas ceremonisë zyrtare të pritjes, dy liderët mbajtën bisedime dypalëshe dhe më pas një takim të zgjeruar me delegacionet përkatëse.
Në takim morën pjesë edhe ministri i Jashtëm i Turqisë, Hakan Fidan, kreu i Organizatës Kombëtare të Inteligjencës, İbrahim Kalın, si dhe zyrtarë të tjerë të lartë turq.
Pas bisedimeve, Erdogan dhe Sharif mbajtën një konferencë të përbashkët për media.
Erdogan: Rajoni nuk duhet të zhytet sërish në gjakderdhje
Presidenti turk deklaroi se qeveria izraelite nuk duhet të lejohet të rikthejë rajonin në një cikël të ri dhune.
“Është e nevojshme të mos lejohet që qeveria aktuale izraelite, e varur nga lufta, ta zhysë edhe një herë rajonin tonë në erën e barutit dhe gjakut”, tha Erdogan.
Ai theksoi se Turqia mbështet çdo iniciativë që ndihmon në uljen e tensioneve dhe në zgjidhjen e krizave përmes diplomacisë.
Sipas tij, Ankaraja do të vazhdojë të bashkëpunojë ngushtë me Pakistanin dhe vendet mike për forcimin e paqes, stabilitetit dhe prosperitetit në rajon.
Synim për thellimin e bashkëpunimit ekonomik
Në konferencën e përbashkët, Erdogan bëri të ditur se Turqia synon të zgjerojë bashkëpunimin me Pakistanin në sektorë strategjikë, përfshirë:
- energjinë;
- transportin;
- mineralet kritike;
- teknologjinë e informacionit.
Presidenti turk ritheksoi se vizioni i Ankarasë është krijimi i një rajoni ku të gjithë popujt, pavarësisht besimit fetar, të jetojnë në paqe, siguri dhe stabilitet.