Kryetari i Nismës Socialdemokrate, Fatmir Limaj, ka bërë thirrje për krijimin sa më të shpejtë të një shumice parlamentare që do të mundësonte konstituimin e Kuvendit të Kosovës dhe formimin e qeverisë së re.
Në një deklaratë për mediat, Limaj theksoi se është e domosdoshme që marrëveshja politike për shumicën parlamentare të arrihet para mbledhjes konstituive të Kuvendit, duke e konsideruar këtë si rrugën e vetme për ndërtimin e institucioneve funksionale.
“Siç kam thënë edhe herën e kaluar, konstituimi i Kuvendit është i vështirë pa një marrëveshje politike të koalicionit që përcakton shumicën parlamentare. Shpresoj dhe besoj se kjo do të ndodhë shumë shpejt, sepse është në interes të Kosovës,” u shpreh Limaj.
Ai ritheksoi se zgjidhja politike duhet të paraprijë çdo hap institucional dhe shfaqi optimizëm se palët do të gjejnë gjuhën e përbashkët për të çuar vendin përpara.
