Nënkryetari i Lidhjes Demokratike të Kosovës (LDK), Lutfi Haziri, ka kritikuar qasjen e Lëvizjes Vetëvendosje (VV) ndaj procesit të konstituimit të institucioneve, duke thënë se LDK do të kishte përfunduar këtë proces pesë javë më parë po të ishte në pozitën e saj.
Duke folur për media para fillimit të seancës konstituive të Kuvendit të Kosovës, Haziri deklaroi se Vetëvendosje mban përgjegjësinë kryesore për zgjidhjen e ngërçit procedural që ka bllokuar institucionet e vendit.
“Nuk ka nevojë të kemi takim politik për procedura, siç po kërkon z. Kurti. Shkohet në takim për të drejtën e fituar. Ajo që mungon këtu është një marrëveshje politike që partia e parë duhet ta realizojë – për Kuvendin dhe për Qeverinë,” tha Haziri.
Ai shtoi se, nëse LDK do të kishte qenë në pozitën e Vetëvendosjes, proceset institucionale do të ishin përmbyllur prej kohësh.
“Me pasë qenë LDK-ja në këtë pozitë, ne para pesë javësh e kishim mbyllur edhe Kuvendin, edhe Qeverinë. Edhe çështjen e presidentes e kishim zbardhur,” theksoi ai.
Haziri theksoi nevojën për një marrëveshje politike të qartë që do t’i hapte rrugë funksionalizimit të institucioneve dhe theksoi se çdo vonesë dëmton interesin e vendit.
