Deputetja e Lëvizjes Vetëvendosje, Fitore Pacolli, ka reaguar ndaj deklaratave të presidentit të Serbisë, Aleksandar Vuçiq, lidhur me mundësinë e ndërhyrjes në resurset ujore dhe infrastrukturën që lidhet me sistemin Ibër-Lepenc.
Pacolli i ka cilësuar deklaratat si “thellësisht shqetësuese dhe të papranueshme”, duke theksuar se resurset ujore nuk mund të përdoren si instrument presioni apo kërcënimi ndaj një shteti tjetër.
“Resurset ujore nuk mund të përdoren si instrument kërcënimi”
Sipas Pacollit, Konventa e Helsinkit përcakton detyrimin e shteteve për bashkëpunim në përdorimin e drejtë dhe të arsyeshëm të ujërave ndërkufitare, parandalimin e dëmeve ndërkufitare dhe mbrojtjen e ekosistemeve ujore.
“Resurset ujore nuk mund të përdoren si instrument kërcënimi, presioni apo destabilizimi ndaj një shteti tjetër”, ka deklaruar Pacolli.
Ajo ka theksuar se Liqeni i Ujmanit dhe sistemi Ibër-Lepenc përbëjnë infrastrukturë kritike dhe strategjike të Republikës së Kosovës.
Sipas saj, ky sistem ka rëndësi jetike për furnizimin me ujë të pijshëm të qindra mijëra qytetarëve, funksionimin e sektorit energjetik, bujqësinë dhe ekuilibrin mjedisor në një pjesë të rëndësishme të Kosovës.
Kërkohet reagimi i bashkësisë ndërkombëtare
Pacolli ka vlerësuar se çdo deklaratë ose veprim që synon ndërhyrjen, dëmtimin, devijimin apo ndryshimin e njëanshëm të rrjedhave ujore dhe infrastrukturës përkatëse duhet të trajtohet si çështje e sigurisë.
“Është çështje e sigurisë ujore, energjetike, mjedisore dhe njerëzore dhe duhet të trajtohet me seriozitetin maksimal nga bashkësia ndërkombëtare”, ka shkruar ajo.
Ajo u ka bërë thirrje Bashkimit Evropian, Shteteve të Bashkuara të Amerikës, Kombeve të Bashkuara dhe partnerëve të tjerë ndërkombëtarë që të reagojnë ndaj deklaratave të tilla dhe të kërkojnë respektimin e parimeve dhe detyrimeve të së drejtës ndërkombëtare për ujërat ndërkufitare.
“Kosova do të mbrojë resurset dhe infrastrukturën e saj”
Në përfundim të reagimit, Pacolli ka deklaruar se institucionet e Kosovës do të mbrojnë resurset ujore dhe infrastrukturën kritike të vendit.
“Republika e Kosovës do të mbrojë resurset e saj ujore, infrastrukturën kritike dhe interesin e qytetarëve të saj, në përputhje me Kushtetutën, ligjet e Republikës së Kosovës dhe parimet e së drejtës ndërkombëtare”, ka shkruar Pacolli.
Deklarata e saj vjen në një kohë kur çështja e Liqenit të Ujmanit dhe sistemit Ibër-Lepenc mbetet një prej çështjeve më të ndjeshme strategjike ndërmjet Kosovës dhe Serbisë, për shkak të rëndësisë së tyre për furnizimin me ujë, energjinë dhe sigurinë e infrastrukturës kritike të Kosovës.