Ministrja e Jashtme e Kosovë, Donika Gërvalla-Schwarz, ka reaguar pas aktgjykimeve për sulmin terrorist në Banjskë, duke theksuar se drejtësia ka nisur të vihet në vend, por ende nuk është e plotë.
Ajo deklaroi se vendimet e gjykatës nuk mund të rikthejnë jetën e Heroit të Kosovës, rreshterit Afrim Bunjaku, i cili u vra gjatë mbrojtjes së rendit kushtetues dhe sigurisë së vendit.
Sipas saj, ky proces nuk e ndryshon faktin që sulmi ishte i organizuar dhe i mbështetur nga Serbi, duke e cilësuar atë si një akt të hapur agresioni ndaj shtetit të Kosovës.
Në këtë rast, Bllagoje Spasojeviq dhe Vlladimir Tolliq janë dënuar me burgim të përjetshëm, ndërsa Dushan Maksimoviq me 30 vite burgim për përfshirjen në sulm.
Megjithatë, Gërvalla theksoi se drejtësia nuk mund të mbetet e pjesshme, duke kërkuar që edhe organizatorët kryesorë, përfshirë Milan Radoičić, të ekstradohen dhe të përballen me drejtësinë në Kosovë.
Ajo shtoi se institucionet e Kosovës do të vazhdojnë të kërkojnë përgjegjësi pa kompromis për çdo akt që cenon sigurinë dhe rendin kushtetues, duke garantuar procese të drejta dhe transparente sipas standardeve ndërkombëtare.
Mesazhi i saj është i prerë: drejtësia ka nisur… por nuk do të ndalet derisa çdo përgjegjës të dalë përpara saj.
