Në prag të rritjes së madhe të buxhetit për mbrojtjen, Gjermania po përballet me paralajmërime serioze për fryrje çmimesh dhe shpenzime joefikase në industrinë e armatimeve. Ekspertët financiarë në Bundestag dhe audituesit shtetërorë po ngrenë alarmin për rrezikun e abuzimeve në prokurimet ushtarake.
Sipas raportimeve, deri në vitin 2030, në sektorin e mbrojtjes pritet të shpenzohen qindra miliarda euro, ndërsa shqetësimi kryesor lidhet me faktin se kompanitë e armatimeve mund të rrisin çmimet duke përfituar nga rritja e kërkesës.
Andreas Schwarz, raportues i buxhetit të mbrojtjes nga Partia Socialdemokrate e Gjermanisë, tha se në këtë sektor ekziston një tendencë e qartë për rritje të çmimeve.
“Kur klienti quhet Bundeswehr, vendosen çmime të tjera,” deklaroi ai.
Dyfishim i çmimit për kontejnerët e karburantit
Një nga rastet më të diskutuara është ai i kontejnerëve të karburantit për Bundeswehr. Sipas të dhënave, brenda vetëm katër vitesh, çmimi për njësi është rritur nga 142 mijë euro në rreth 291 mijë euro, pra më shumë se dyfish.
Për shkak të kësaj rritjeje të pazakontë, ekspertët e buxhetit kanë vendosur të bllokojnë përkohësisht porositë e reja për këta kontejnerë.
Politikani i Aleanca 90/Të Gjelbrit, Sebastian Schäfer, kritikoi ashpër kostot e projekteve të ushtrisë gjermane, duke theksuar se në krahasim me vendet e tjera, disa prokurime janë dukshëm më të shtrenjta.
Mungesa e konkurrencës, shkaku kryesor
Sipas ekspertëve, një nga arsyet kryesore për këtë situatë është mungesa e konkurrencës në tregun e armatimeve. Schwarz kërkoi që në të ardhmen prokurimet të monitorohen më rreptësisht përmes ligjeve të konkurrencës, në mënyrë që të parandalohet fryrja artificiale e çmimeve.
Edhe Enti Federal i Kontrollit të Shtetit dhe Auditimit ka paralajmëruar se fondet e mëdha shtesë për ushtrinë mund të krijojnë terren për shpenzime joefikase dhe keqmenaxhim.
Sipas raportit të tyre, kur një institucion përfiton shumë më tepër fonde brenda një periudhe të shkurtër, rritet ndjeshëm rreziku i vendimeve të nxituara dhe i kontratave me kosto të fryra.
Ky debat vjen në një kohë kur Gjermania po investon agresivisht në modernizimin ushtarak, mes tensioneve gjeopolitike në rritje dhe presionit për forcimin e kapaciteteve mbrojtëse në NATO.
