Gjermania po përgatitet të shtrëngojë ndjeshëm kontrollet teknike për makinat, një lëvizje që mund të nxjerrë jashtë qarkullimit miliona automjete të vjetra. Qëllimi është i thjeshtë: më pak ndotje dhe ajër më i pastër. Nëse kjo do të ndodhë realisht, varet vetëm nga politikanët.
16 milionë makina në shënjestër
Aktualisht, çdo makinë në Gjermani teston sigurinë dhe emetimet çdo dy vjet. Por shumë automjete të vjetra – sidomos naftës Euro 5 dhe disa benzinë Euro 6 – e kalojnë testin “me letra”, jo në realitet. TÜV kërkon ndryshim: kontrolle më të rrepta dhe matje reale të gazrave ndotës. Nëse propozimi miratohet, afro 16 milionë makina do të preken.
Skandali i VW ende ndikon
Pas skandalit “Dieselgate” të vitit 2015, ku Volkswagen manipuloi shifrat e emetimeve, autoritetet ende po përpiqen të vënë rregull. Shumë makina Euro 5 vazhdojnë të lëshojnë NOx në nivele të larta, pa asnjë monitorim serioz.
Problemi kryesor është “dritarja termike” – një teknologji që kufizon sistemin e pastrimit të gazrave vetëm në temperatura të caktuara. Gjykata Administrative e Schleswig-Holstein së fundmi e ka ndaluar këtë praktikë, duke goditur drejtpërdrejt prodhuesit.
7.8 milionë makina mund të detyrohen në ripajisje
Deutsche Umwelthilfe kërkon që Ministria e Transportit të detyrojë KBA-në të bëjë ripajisjen teknike të të gjitha makinave Euro 5 dhe Euro 6a-6c – me shpenzimet e prodhuesve. Nëse jo, makinat duhet të tërhiqen nga tregu. Bëhet fjalë për rreth 7.8 milionë automjete. Volkswagen pritet ta apelojë vendimin.
BE në pritje të vendimit final
Komisioni Europian po përgatit reformën e re të kontrolleve të emetimeve, që për herë të parë mund të përfshijë edhe makinat e vjetra me benzinë. Shtetet anëtare po konsultohen dhe vendimi pritet në dhjetor. Gjermania thotë se është pro, por kërkon metoda testimi të besueshme.
A do të pastrohet realisht ajri?
TÜV argumenton se kontrollet e reja mund të rrisin ndjeshëm cilësinë e ajrit. Modelet ekzistojnë: Kina, Amerika Latine dhe Belgjika prej kohësh monitorojnë seriozisht emetimet e NOx, madje edhe për makinat e vjetra.
Në fund të ditës, gjithçka varet nga politika. Teknologjia ekziston. Vullneti, ende jo.
