Kryetari i Aleanca për Ardhmërinë e Kosovës, Ardian Gjini, ka deklaruar se partia e tij është e gatshme të kontribuojë në zhbllokimin e ngërçit institucional, pa vendosur kushte për poste qeveritare, por me kërkesën për një zotim të qartë mbi disa prioritete strategjike shtetërore.
Sipas Gjinit, AAK nuk synon asnjë pozitë në qeverinë e ardhshme, por kërkon që institucionet e reja të angazhohen për një agjendë që garanton zhvillim ekonomik, siguri energjetike dhe forcim të shtetit.
“Pa asnjë kusht dhe pa synuar asnjë post në Qeverinë e ardhshme, Aleanca është e gatshme të zhbllokojë ngërçin institucional, por vetëm për një agjendë që garanton zhvillim dhe siguri kombëtare”, ka deklaruar ai.
Gjini ka prezantuar gjashtë kërkesa kryesore, të cilat i cilësoi si jetike për të ardhmen e Kosovës:
1. Orientimi strategjik dhe gazi amerikan
Pranimi i menjëhershëm i projektit të gazit amerikan si prioritet shtetëror për siguri energjetike.
2. Pavarësia energjetike
Nisja e menjëhershme e procedurave për ndërtimin e një termocentrali të ri me thëngjill.
3. Lehtësime për bizneset e vogla
Rritja e pragut të TVSH-së nga 30 mijë euro në 100 mijë euro për të lehtësuar barrën fiskale.
4. Mbështetje për bujqësinë
Lirimi i plotë i tokës së punuar nga tatimi në pronë, me synim stimulimin e prodhimit vendor.
5. Financimi i infrastrukturës
Sigurimi i financimit të plotë buxhetor për projektet rrugore dhe kapitale që kanë mbetur pezull.
6. Fond emergjent për kryeqytetin
Ndarja e 800 milionë deri në 1 miliard euro investime kapitale për Prishtina.
Në fund, Gjini theksoi se këto gjashtë pika përbëjnë, sipas tij, një projekt konkret për të garantuar energji, siguri dhe zhvillim afatgjatë për qytetarët e Kosovës.
