Gjykata Kushtetuese e Kosovës ka publikuar të enjten, më 26 qershor 2025, aktgjykimin lidhur me ngërçin institucional të krijuar pas zgjedhjeve të parakohshme parlamentare. Në vendim, Kushtetuesja i ka dhënë partive politike një afat të qartë dhe të detyrueshëm: konstituimi i Kuvendit duhet të ndodhë brenda tridhjetë (30) ditësh nga dita e certifikimit të rezultateve.
“Duhet që sa më shpejt dhe jo më vonë se tridhjetë (30) ditë të përfundojnë seancën konstituive të Kuvendit, duke zgjedhur Kryetarin dhe nënkryetarët e tij”, thuhet në aktgjykim.
Ky vendim është marrë në kontekstin e tensioneve politike që pasuan zgjedhjet e fundit, ku mosmarrëveshjet ndërmjet partive kishin bllokuar procesin e formimit të institucioneve.
Vendimi i plotë përmban 47 faqe dhe është i qasshëm për publikun në faqen zyrtare të Gjykatës Kushtetuese. Dokumentin mund ta lexoni dhe shkarkoni në këtë link zyrtar.
Ky aktgjykim pritet të ndikojë drejtpërdrejt në rrjedhën politike të ditëve në vijim, duke i detyruar partitë të veprojnë brenda afateve kushtetuese për formimin e legjislaturës së re.
