Lëvizja Vetëvendosje ka vendosur t’i besojë Ministrit aktual të Kulturës, Rinisë dhe Sportit, Hajrulla Çeku, kandidimin për kryetar të Komunës së Prishtinës në zgjedhjet lokale që do të mbahen më 12 tetor.
Sipas raportimit të gazetës KOHA, prezantimi zyrtar i kandidaturës së Çekut pritet të bëhet të mërkurën nga ora 17:00.
Vetëvendosje, e cila në zgjedhjet parlamentare të fundit fitoi 42 për qind të votave, synon ta rikthejë qeverisjen e kryeqytetit pas një mandati katërvjeçar nën udhëheqjen e Përparim Ramës nga Lidhja Demokratike e Kosovës. Në zgjedhjet komunale të vitit 2021, Rama e kishte mposhtur kandidatin e LVV-së, Arben Vitia, në balotazh.
Ndërkohë, nga partitë tjera politike, vetëm Aleanca për Ardhmërinë e Kosovës dhe Partia Socialdemokrate kanë zyrtarizuar kandidatët e tyre. AAK-ja do të garojë me Bekë Berishën, ndërsa PSD-ja ka zgjedhur Besa Shahinin si pretendente për udhëheqjen e Prishtinës.
