Ish-kryeministri i Kosovës, Avdullah Hoti, ka reaguar ashpër ndaj iniciativës për ndryshime kushtetuese lidhur me mënyrën e zgjedhjes së presidentit, duke e cilësuar atë si një përpjekje të nxituar dhe të motivuar nga interesa personale.
Në një reagim publik, Hoti tha se në ditën e fundit të afatit kushtetues për zgjedhjen e presidentit është tentuar të ndryshohen rregullat përmes procedimit të amendamenteve, të cilat sipas tij bien ndesh me rregulloren e punës së Kuvendit të Kosovës.
Ai e cilësoi këtë veprim si një përpjekje të dëshpëruar për të ndryshuar rregullat e lojës politike në momentet e fundit.
“Kjo nuk është reformë kushtetuese. Kjo është marrëzi politike”, ka shkruar Hoti.
Sipas tij, nëse presidentja aktuale Vjosa Osmani do të ishte kandiduar nga kryeministri Albin Kurti, atëherë askush nuk do ta problematizonte faktin që presidenti nuk zgjidhet drejtpërdrejt nga populli.
Hoti tha se në atë rast Kushtetuta do të konsiderohej në rregull dhe procedurat do të respektoheshin, ndërsa askujt nuk do t’i shkonte ndërmend të propozonte ndryshime kushtetuese brenda një kohe të shkurtër.
Ai paralajmëroi se trajtimi i Kushtetutës si mjet për interesa të ngushta politike paraqet problem serioz për funksionimin demokratik të vendit.
“Kur Kushtetuta fillon të trajtohet si mjet për interesa të ngushta politike, atëherë problemi nuk është tek mënyra e zgjedhjes së presidentit, por tek mentaliteti i atyre që pushtetin e shohin si pronë personale”, ka theksuar Hoti.
