Kandidati për deputet i LDK-së, Avdulah Hoti, ka komentuar intervistën e fundit të kryeministrit në detyrë Albin Kurti.
Ai ka bërë me dije se lideri i VV-së nuk ishte në gjendje të tregonte asnjë projekt që ka ndryshuar jetën e qytetarëve.
Në profilin e tij në Facebook, ai ka shkruar se në këtë intervistë Kurti ka bërë vetëm propagandë.
“Gazetari Fidan Rama e pyeti Kurtin për tri projektet me të cilat krenohen pas gjithë këtyre viteve në pushtet. Përgjigjja ishte zbuluese për qeverisjen e tij të zbrazët, por edhe dëshpëruese: nuk arriti të përmendë asnjë projekt serioz dhe madhor që ka ndryshuar jetën e qytetarëve. Rrjedhimisht, u kthye te zanati i tij i vetëm prej se është në politikë: propaganda, mashtrimi dhe fajësimi i të tjerëve. Kur nuk ke rezultate, shpik armiq. Kur nuk ke projekte, prodhon justifikime”, ka shkruar ai, duke dhënë detaje tjera.
“Por propaganda nuk mund t’i fsheh milionat e shpërndara me tenderë njëburimorë. Nuk i arsyeton kontratat e negocuara në ËhatsApp. Nuk i zhduk dyshimet për keqpërdorimin e parasë publike. Vetëm gjatë vitit 2025, Auditori i Përgjithshëm ka referuar 80 lëndë në Prokurori bazuar në gjetjet e auditimeve në institucione të ndryshme. Koha e propagandës po mbaron. Koha e llogaridhënies po afrohet. Dhe për dallim nga konferencat për shtyp, para ligjit nuk mjafton propaganda”, ka shkruar ai.
